Sud u ZŠA admianiŭ abmiežavańni na imihracyjnyja vizy dla biełarusaŭ
Fiederalny sud u štacie Ńju-Jork pryznaŭ niezakonnym i admianiŭ rašeńnie Dziarždepartamienta ZŠA ab prypynieńni vydačy imihracyjnych vizaŭ hramadzianam 75 krain, paviedamlaje ahienctva Reuters. U hety śpis uvachodziła i Biełaruś.
Abmiežavańni pačali dziejničać u studzieni 2026 hoda. Akramia Biełarusi, jany zakranuli hramadzian Rasii, Brazilii, Kałumbii, Uruhvaja, Bośnii i Hiercahaviny, Ałbanii, Pakistana, Banhładeš i šerahu krain Afryki, Blizkaha Uschodu i Karybskaha rehijonu.
U amierykanskim Dziarždepartamiencie tłumačyli rašeńnie tym, što niekatoryja imihranty mohuć stać «hramadskim ciažaram» — heta značyć karystacca finansavymi i inšymi resursami fiederalnych, rehijanalnych abo miascovych uładaŭ ZŠA.
Pry hetym zabarona tyčyłasia tolki imihracyjnych vizaŭ, jakija vydajucca dla pierajezdu ŭ ZŠA na pastajannaje miesca žycharstva. Na nieimihracyjnyja vizy, u tym liku turystyčnyja i dziełavyja, jana nie raspaŭsiudžvałasia.
Fiederalnaja sudździa Žaniet Varhas pryjšła da vysnovy, što Dziarždepartamient pieravysiŭ svaje paŭnamoctvy. Na jaje dumku, amierykanskaje mihracyjnaje zakanadaŭstva nie dazvalaje dziaržsakrataru faktyčna spyniać vydaču imihracyjnych vizaŭ hramadzianam dziasiatkaŭ krain tolki na padstavie ich hramadzianstva.
Sudździa nazvała palityku Dziarždepartamienta vidavočna niezakonnaj i pastanaviła jaje admianić.
Abmiežavańni asprečyli pravaabarončyja imihracyjnyja arhanizacyi, zajaŭniki na imihracyjnyja vizy, a taksama hramadzianie ZŠA, jakija vystupali sponsarami dla svaich svajakoŭ z krain, što trapili ŭ śpis.
Čytajcie taksama:
ZŠA stali čaściej admaŭlać biełarusam u prytułku
Historyi biełaruskich siemjaŭ, jakija prajšli praź mihracyjnyja turmy ZŠA
Biełaruś jość siarod krain, hramadzianam jakich amierykancy nie buduć vydavać imihracyjnyja vizy