Kaledž chacieŭ zasudzić studenta i spahnać ź jaho 13 tysiač rubloŭ — ale junak daŭ adpor sistemie

Niekali Zachar pastupiŭ pa metavym nakiravańni ŭ kaledž — rychtavaŭsia pracavać na viežavym kranie. Praz prablemy sa zdaroŭjem daviałosia kinuć vučobu, i kaledž chacieŭ spahnać z Zachara vielizarnuju sumu, ale chłopiec vyjhraŭ sud.

Fota: zaharfrab_2 / TikTok

Usio pačałosia ŭ 2022 hodzie. Zachar raskazaŭ u tyktoku, što tady jon, niepaŭnaletni, pastupiŭ u kaledž i razam z maci padpisaŭ metavuju damovu z kampanijaj «Upraŭleńnie miechanizacyi №79». Paśla vypusku chłopiec musiŭ adpracavać dva hady pa metavym nakiravańni, ale ž heta jaho nie biantežyła.

Na druhim kursie źjavilisia prablemy — Zachara pačaŭ ckavać kuratar:

«Mianie prosta vyžyvali, ja trapiŭ u balnicu. Pisaŭ skarhi va ŭsie instancyi: u Ministerstva [adukacyi], u Kamitet pa adukacyi, u Minharvykankam. Dajšoŭ da člena Savieta respubliki. Biessensoŭna — usie skarhi adpraŭlali nazad u kaledž. I paśla hetaha pačałasia sapraŭdnaja vajna, mianie prosta źnienavidzieli».

Kali Zachara zaličyli na treci kurs, u jaho musiła pačacca vytvorčaja praktyka. Ale ź joj było składana, bo ŭ chłopca pačała časta kružycca hałava, a z takoj prablemaj pracavać na viežavym kranie, to-bok na vyšyni, niebiaśpiečna.

Zachar kazaŭ majstram, što jamu drenna, ale ŭ adkaz jaho prosta pačali raniej adpuskać z praktyki. Chłopiec źviartaje ŭvahu: pierad praktykaj jaho nie adpravili na miedahlad i dapuścili da pracy prosta pa daviedcy dla fizkultury. U kaledžy, adnak, ličać, što Zachar sam musiŭ viedać pra svoj stan.

U vyniku chłopca adličyli, patłumačyŭšy heta tym, što jon nibyta prahulščyk i tamu nie prajšoŭ vytvorčuju praktyku. A dalej raspačalisia sudy:

«Suprać mianie padali pozvu, kab spahnać u miascovy biudžet srodki za navučańnie. Prasili 13 190 biełaruskich rubloŭ. My sudzilisia 2,5 miesiaca, i sud vyrašyŭ nakiravać mianie na miedkamisiju — heta nie ź inicyjatyvy kaledža, a ź inicyjatyvy suda Leninskaha rajona Minska».

Na toj miedkamisii zrabili vysnovu, što Zachar nie prydatny dla prachodžańnia praktyki, bo dla jaho heta prosta niebiaśpiečna. Tady ŭ kaledžy vyrašyli adklikać pazoŭ.

Ale Zachar nie spyniŭsia na maleńkaj pieramozie i sam padaŭ pazoŭ na kaledž. Chłopiec zapatrabavaŭ, kab zahad pa jahonym dopusku na praktyku i samo jaho adličeńnie pryznali niezakonnym, a taksama zamianili farmuloŭku pra prahuły ŭ papierach ab adličeńni. Zachar pryznaje, što časam prapuskaŭ praktyku, ale pisaŭ u tłumačalnych, što ŭ jaho kružycca hałava.

U adkaz na jahonuju pozvu kaledž naniaŭ advakata, jaki vyrašyŭ viarnucca da taho samaha pazovu na 13 190 rubloŭ. Paśla pieršych pasiadžeńniaŭ Zachar nie chavaŭ emocyi ŭ tyktoku:

«Nie soramna? Vy sami, kali pabačyli dyjahnaz u sudzie, admovilisia ad isku. A ciapier, kali ja prašu ŭsiaho tolki vypravić mnie dakumienty, bo vy skazali, što heta tolki praz sud, vy najmajecie advakata i sprabujecie mianie raścisnuć».

Zachar raskazvaje, što na sudovych pasiedžańniach advakat začytvaŭ jaho staryja charaktarystyki, nazyvaŭ chłopca prahulščykam i manipulataram. Sam Zachar tym časam atrymaŭ list ad čynoŭnikaŭ, što tyja pryciahnuli da dyscyplinarnaj adkaznaści namieśnika dyrektara pa vytvorčym navučańni i majstra vytvorčaha navučańnia — supracoŭnikaŭ kaledža, jakija nie pravieryli najaŭnaść u jaho miedahladu.

19 žniŭnia sudy dla chłopca narešcie zakončylisia. Zachar znoŭ pieramoh: jaho nakiravańnie na praktyku i adličeńnie pryznali niezakonnymi, i viartać hrošy nie daviadziecca.

«Ja nie złamaŭsia, ja nie spužaŭsia, prajšoŭ hety šlach da kanca. Spraviadlivaść jość, i ja heta dakazaŭ», — radujecca chłopiec.

Kamientary da artykuła