U Homieli pakazali bivień mamanta z samym staražytnym arnamientam u Biełarusi

U Homielskim pałacava-parkavym ansambli adkryłasia vystava, pryśviečanaja 100‑hodździu adkryćcia Bierdyžskaj stajanki čałavieka epochi vierchniaha palealitu, piša Times.by.

Fota: Homielski pałacava-parkavy ansambl

Bierdyžskuju stajanku ŭ 1926 hodzie adkryŭ archieołah Kanstancin Palikarpovič. Jaje ŭzrost aceńvajecca prykładna na 23,5 tysiačy hadoŭ, i jana źjaŭlajecca adnym z najstaražytniejšych archieałahičnych pomnikaŭ na terytoryi Biełarusi.

Centralnym ekspanatam vystavy stała ŭnikalnaja płaścina ź biŭnia mamanta z vyhraviravanym arnamientam. Jaje znajšli jašče ŭ 1970 hodzie padčas daśledavańniaŭ Bierdyžskaha archieałahičnaha kompleksu.

Doŭhi čas znachodka zachoŭvałasia ŭ archieałahičnym kabiniecie Homielskaha dziaržaŭnaha ŭniviersiteta, a paźniej była pieradadzienaja ŭ muziej. U navukovaje abaračeńnie artefakt uviali tolki sioleta. Raniej jaho pamyłkova ličyli kopijaj bolš staražytnaj znachodki. Paśla ačystki i restaŭracyi vyśvietliłasia, što heta sapraŭdnaja płaścina ź biŭnia mamanta.

U sabranym vyhladzie jana maje 18,5 santymietra ŭ daŭžyniu i 14,8 santymietra ŭ šyryniu. Na jaje pavierchni staražytny čałaviek nanios abstraktny hieamietryčny arnamient z nasiečak, kasych kryžoŭ i zihzahaŭ.

Navukoŭcy adznačajuć, što charaktar hetych vyjaŭ adpaviadaje arnamientalnym tradycyjam vierchniaha palealitu centralnaj častki Uschodnie-Jeŭrapiejskaj raŭniny.

Takim čynam, u Homieli ciapier možna ŭbačyć adzin z samych unikalnych uzoraŭ palealityčnaha mastactva, znojdzienych na terytoryi Biełarusi.

Kamientary da artykuła