U Kazachstanie zahareŭsia adzin z najbujniejšych naftazavodaŭ
Zavod raźmieščany ŭ Atyraŭskaj vobłaści, jakaja miažuje z Astrachanskaj vobłaściu Rasii.
azh.kz
U Kazachstanie adbyŭsia pažar na Atyraŭskim naftapierapracoŭčym zavodzie — adnym z troch najbujniejšych NPZ krainy mahutnaściu 5,5 młn ton nafty na hod, piša Moscow Times.
U pres-słužbie pradpryjemstva paviedamili, što zahareŭsia naftapłastyk unutry adstojnika miechaničnych ačyščalnych zbudavańniaŭ zakrytaha typu. Na toj momant raboty tam nie vialisia. Nichto nie paciarpieŭ. Zavod praciahvaje pracavać u štatnym režymie. U internecie źjavilisia kadry ź miesca zdareńnia. Paźniej u MNS Kazachstana paviedamili, što pažar na NPZ likvidavany. Jaho tušyli 65 čałaviek i 19 adzinak techniki.
Zavod raźmieščany ŭ Atyraŭskaj vobłaści, jakaja miažuje z Astrachanskaj vobłaściu Rasii. Jaho ŭviali ŭ ekspłuatacyju ŭ 1945 hodzie, uładalnikam źjaŭlajecca nacyjanalnaja naftahazavaja kampanija «KazMunajHaz».
NPZ zahareŭsia paśla paviedamleńniaŭ pra toje, što Kazachstan pahadziŭsia pierapracoŭvać rasijskuju naftu i viartać Maskvie 70% vyrablenaha bienzinu i dyzielnaha paliva.
Ministr enierhietyki respubliki Jerłan Akienženaŭ udakładniŭ, što dla realizacyi hetaj damoŭlenaści budzie zadziejničany zavod «Kandensat» mahutnaściu 850 tysiač ton na hod.
Kazachstan taksama pačaŭ pastaŭlać u Rasiju, dzie nabiraje abaroty druhaja chvala paliŭnaha kryzisu, nievialikija partyi bienzinu AI-92.