Pamierła lehienda kantry-muzyki Doli Partan

Doli Partan, adna z samych viadomych vykanaŭcaŭ u historyi kantry-muzyki, pamierła va ŭzroście 80 hadoŭ. Pra jaje śmierć 25 žniŭnia paviedamiła siamja. Śpiavačka mirna pamierła ŭ Nešvile, pryčyna śmierci pakul nie raskryvajecca.

Doli Partan

U siaredzinie žniŭnia Partan raskazvała pra paharšeńnie zdaroŭja i admianiła zapłanavany vizit u tematyčny park Dollywood, jaki joj naležaŭ. Raniej jana taksama adkłała vystupleńni ŭ Łas-Viehasie.

Doli Partan naradziłasia 19 studzienia 1946 hoda ŭ Tenesi ŭ šmatdzietnaj siamji. Muzyčnuju karjeru jana pačała jašče ŭ dziacinstvie, a prafiesijna vystupać stała ŭ 1950-ch. Za amal šeść dziesiacihodździaŭ tvorčaści Partan vypuściła dziasiatki albomaŭ i napisała bolš za 3000 piesień. Siarod jaje samych viadomych kampazicyj — Jolene, I Will Always Love You, 9 to 5 i Coat of Many Colors. Jana pradała bolš za 100 miljonaŭ zapisaŭ i stała adnoj z najbolš upłyvovych žančyn u historyi kantry.

Partan atrymała 11 premij «Hremi», u tym liku ŭznaharodu za žyćciovyja dasiahnieńni, a taksama była ŭklučanaja ŭ Zały słavy kantry-muzyki i rok-n-rołu. Jana taksama sprabavała siabie ŭ kino i na telebačańni, atrymlivała naminacyi na «Oskar», «Emi» i «Toni».

Akramia muzyki, Partan była paśpiachovaj pradprymalnicaj i aktyŭna zajmałasia dabračynnaściu. Jana stvaryła tematyčny park Dollywood, jaki staŭ bujnym turystyčnym i pracoŭnym centram u Tenesi. Jaje prajekt Imagination Library biaspłatna razdaje dzieciam knihi i spryjaje raźvićciu rańniaha čytańnia. Za hady isnavańnia prahrama pieradała junym čytačam užo bolš za 300 miljonaŭ knih.

Kamientary da artykuła