Mužčyna pad uździejańniem narkotykaŭ pačaŭ hłytać padručnyja pradmiety. Vynik — śmierć
Niaščaście zdaryłasia ŭ Barysaŭskim rajonie.
Nierazumnyja pavodziny stali pryčynaj vykliku milicyi. 42‑hadovy mužčyna pavodziŭ siabie ahresiŭna, čym vyklikaŭ u svajoj žonki abhruntavanyja aściarohi za ŭłasnaje žyćcio i biaśpieku, paviedamlaje Dziaržkamitet sudovych ekśpiertyz
Akramia biespryčynnaj ahresii, pavodziny mužčyny pačali imkliva stanavicca ŭsio bolš dziŭnymi: jon chapaŭ roznyja pradmiety, u tym liku mikraschiemy, arkušy papiery, polietylenavyja pakiety, i sprabavaŭ ich prahłynuć. Paśla hetaha raptoŭna straciŭ prytomnaść i ŭpaŭ na padłohu.
Bryhada chutkaj dapamohi, jakaja prybyła na miesca, kanstatavała śmierć mužčyny. Padčas vonkavaha daśledavańnia trupa jakich-niebudź cialesnych paškodžańniaŭ vyjaŭlena nie było.
Sudovyja ekśpierty vyznačyli, što pryčynaj śmierci mužčyny stała miechaničnaja aśfiksija ŭ vyniku pierakryćcia dychalnych šlachoŭ inšarodnymi ciełami.
U horle zahinułaha byli vyjaŭlenyja roznyja pradmiety, u tym liku płastykavaja nakryŭka, fłeška, achoŭnaja plonka dla ekrana telefona, frahmienty polietylenu, jakija źliplisia pamiž saboj u adzinuju masu i ščylna pierakryli dychalnyja šlachi.
Akramia taho, u kryvi mužčyny sudovyja ekśpierty vyjavili psichatropnaje rečyva — alfa-PVP.