Rasija mocna paškodziła Chiersonskuju CEC. Horad moža nadoŭha zastacca bieź śviatła i ciapła

Unačy rasijskija vojski atakavali Chiersonskuju ciepłaelektracentral avijacyjnymi bombami. U vyniku abjekt krytyčnaj infrastruktury atrymaŭ značnyja paškodžańni, paviedamiŭ kiraŭnik Chiersonskaj abłasnoj vajskovaj administracyi Alaksandr Prakudzin.

Chiersonskaja CEC paśla ŭdaru

Heta nie pieršaja ataka na CEC, adnak hetym razam razbureńni asabliva surjoznyja. Pa słovach Prakudzina, raźličvać na zvyčajnuju pracu CEC i inšych abjektaŭ krytyčnaj infrastruktury hetaj zimoj užo nielha.

Jon papiaredziŭ, što Chierson moža zastavacca biez elektryčnaści i ciapła nie hadziny ci dni, a praciahły čas.

Ułady zaklikali žycharoŭ horada, najpierš siemji ź dziećmi i pažyłych ludziej, pa mahčymaści vyjechać u bolš biaśpiečnyja rehijony, dzie jość svajaki abo znajomyja. Abłasnaja administracyja hatovaja dapamahčy z evakuacyjaj, transpartam, raśsialeńniem i sacyjalnaj padtrymkaj.

Pry hetym haradskija ŭłady, kamunalnyja słužby, enierhietyčnyja kampanii i ŭrad šukajuć alternatyŭnyja sposaby zabiaśpiečyć Chierson elektryčnaściu i ciapłom.

Na praciahu 2026 hoda Chiersonskaja CEC užo dziasiatki razoŭ stanaviłasia mišeńniu rasijskich udaraŭ.

Kamientary da artykuła