Abaraniać Słaviansk i Kramatorsk daručana lehiendarnym hienierałam Bileckamu i Prakapienku. Jaki płan Ukrainy?
Prezident Ukrainy Uładzimir Zialenski zajaviŭ pra stvareńnie dźviuch novych hrupovak vojskaŭ, jakija buduć adkazvać za abaronu Danieckaj vobłaści. Imi buduć kamandavać bryhadnyja hienierały Andrej Bilecki i Dzianis Prakapienka, piša VVS.
U paviedamleńni Ofisa prezidenta Ukrainy adznačajecca, što adpaviednyja prapanovy kiraŭniku dziaržavy pradstaviŭ hałoŭnakamandujučy Uzbrojenych sił Ukrainy Michajła Drapaty padčas narady pa pytańniach biaśpieki 26 žniŭnia.
«Dla pavyšeńnia efiektyŭnaści abarony Danieččyny hałoŭnakamandujučy Uzbrojenych sił Ukrainy ŭnios prapanovy ab stvareńni dźviuch hrupovak. Imi buduć kamandavać Hieroi Ukrainy Andrej Bilecki i Dzianis Prakapienka», — havorycca ŭ paviedamleńni Ofisa prezidenta Ukrainy.
«Za abaronu Danieččyny buduć adkazvać kamandziry-lidary, jakija zdolnyja heta rabić, jakim vierać i za jakimi iduć», — prakamientavaŭ hetaje rašeńnie namieśnik kiraŭnika Ofisa prezidenta Pavieł Palisa.
Kiraŭnik Sił bieśpiłotnych sistem Robiert Broŭdzi z pazyŭnym «Madziar» stanoŭča acaniŭ rašeńnie ab stvareńni novych hrupovak na Danieččynie.
«Heta i jość Smart War. Novastvoranyja hrupoŭki vojskaŭ Redzisa (pazyŭny Dzianisa Prakapienki. — Red.) i Bileckaha. Čas sietkacentryčnaj vajny. Poŭnaja sinchranizacyja z hrupoŭkaj SBS, najkaraciejšy łancužok «Sensar — Stralec», — adznačyŭ jon.
Ciapier Prakapienka kamanduje 1‑m korpusam Nacyjanalnaj hvardyi «Azoŭ», a Bilecki — 3‑m armiejskim korpusam. Zonaj adkaznaści 3‑ha armiejskaha korpusa źjaŭlajecca ŭčastak frontu pamiž Limanam u Danieckaj vobłaści i Baravoj u Charkaŭskaj vobłaści.
«Azoŭ» adkazvaje za ŭčastak frontu ŭ rajonie Dabrapolla i Družkaŭki ŭ Danieckaj vobłaści.
Pad kiravańnie novych hrupovak, vierahodna, trapiać armiejskija karpusy, jakija vajujuć na susiednich učastkach. Tak, pobač z 3‑m armiejskim korpusam na słavianska-kramatorskim napramku vajuje 11‑y armiejski korpus. Niadaŭna jaho kamandziram staŭ daśviedčany pałkoŭnik Emil Iškułaŭ.
Za abaronu susiednich Družkaŭki i Kanstancinaŭki adkazvaje 19‑y armiejski korpus. Tut taksama źmianiŭsia kamandzir — u žniŭni korpus uznačaliŭ hienierał Valer Skred.
Pobač z Dabrapollem i na poŭdzień ad Pakroŭska ŭ Danieckaj vobłaści vajujuć 7‑y korpus Desantna-šturmavych vojskaŭ i 20‑y armiejski korpus.
Mabyć, novyja hrupoŭki, jakija buduć abaraniać Danieččynu, buduć dziejničać u farmacie apieratyŭna-stratehičnych hrupovak vojskaŭ — źviana, jakoje było likvidavana ŭ 2025 hodzie padčas korpusnaj reformy va Uzbrojenych siłach Ukrainy.
Vajenny analityk Mikałaj Bialeskaŭ taksama ličyć, što stvareńnie dźviuch hrupovak na asnovie peŭnaj kolkaści karpusoŭ — heta sproba vyrašyć prablemu apieratyŭna-stratehičnaha ŭzroŭniu kiravańnia.
Havorka idzie pra faktyčnuju adsutnaść va Ukrainie naležnaj sistemy kiravańnia «siaredniaha źviana», heta značyć apieratyŭna-stratehičnaha, na poli boju. Heta pryviało da taho, što hetyja funkcyi praciahły čas byŭ vymušany brać na siabie hałoŭnakamandujučy Uzbrojenymi siłami Ukrainy.
Na dumku Bialeskava, Ukrainie nieabchodna «terminova navieści paradak» jak z razdvajeńniem funkcyj hałoŭnakamandujučaha, tak i z adsutnaściu siaredniaha źviana kiravańnia.
«Bo kali nie vyrašyć druhuju prablemu, to adnačasova budzie i spakusa, i nieabchodnaść hałoŭnakamandujučamu čaściej, čym treba, spuskacca na adpaviedny ŭzrovień i mienš zajmacca stratehičnym kiravańniem», — ličyć jon.
U pres-słužbie 1‑ha armiejskaha korpusa admovilisia kamientavać Bi-bi-si padrabiaznaści stvareńnia novaj hrupoŭki na čale z kamandujučym Prakapienkam. U pres-słužbie 3‑ha armiejskaha korpusa zapyt Bi-bi-si ŭsio jašče razhladajuć i pakul nie dali na jaho adkazu.
Jakaja situacyja na Danieččynie
Rearhanizacyja vojskaŭ adbyvajecca ŭ davoli składanaj situacyi ź biaśpiekaj na Danieččynie.
Naprykancy viasny i letam 2026 hoda Rasija abrała mienavita hety ŭčastak frontu pryjarytetnym dla svajho nastupleńnia. Mienavita tut dziejničaje najbolš šmatlikaja i najbolš bajazdolnaja rasijskaja hrupoŭka.
«U Pucina niaźmiennaja pieršačarhovaja meta na froncie — Kanstancinaŭka — Słaviansk. Apošni termin, jaki jon daŭ svaim hienierałam, — da kanca hoda zaviaršyć akupacyju Danieckaj i Łuhanskaj abłaściej. Heta niemahčyma. Taki naš adkaz», — zajaviŭ 22 žniŭnia prezident Zialenski žurnalistam.
Stanam na 26 žniŭnia rasijskim vojskam udałosia nablizicca prykładna na 6 kiłamietraŭ da ŭskrain Słavianska i prykładna na 8 kiłamietraŭ — da Kramatorska. Asnoŭnyja bai iduć kala pasiołkaŭ Raj-Alaksandraŭka, Mikałajeŭka, Arychuvatka, Vasiucinskaje i Malinaŭka.
Pra akupacyju susiedniaha horada — Kanstancinaŭki — kiraŭnik Rasii Uładzimir Pucin zajaviŭ jašče 3 lipienia. Ukrainskija ŭłady admaŭlajuć stratu nasielenaha punkta.
Zamiežnyja OSINT-analityki, naprykład amierykanski «Instytut vyvučeńnia vajny» (ISW), taksama pakazvajuć na toje, što ŭ paŭnočnaj častcy Kanstancinaŭki, vierahodna, jašče zastajucca ŭkrainskija pazicyi.
Taksama paviedamlajecca, što rasijskija vajskoŭcy ŭžo nablizilisia da ŭskrain Dabrapolla i Limana i sprabujuć prarvacca ŭ žyłuju zabudovu hetych nasielenych punktaŭ.
Ukrainski analityčny OSINT-prajekt DeepState zajaŭlaje, što stanam na 26 žniŭnia rasijskija vajskoŭcy aktyŭna pranikajuć u žyłyja kvartały Kanstancinaŭki, a taksama abychodziać jaje z zachodniaha i ŭschodniaha fłanhaŭ.
«Adnak u najbolšaj niebiaśpiecy ciapier znachodzicca Časaŭ Jar, jaki praciŭnik achoplivaje kantrolem nad navakolnaj miascovaściu. U samim horadzie ŭdajecca ŭtrymlivać pazicyi, ale kali ŭpaduć fłanhi, u pryvatnaści na ŭčastku vyšej, to hrupoŭcy ŭ nasielenym punkcie Časaŭ Jar daviadziecca vielmi ciažka», — havorycca ŭ paviedamleńni.
Što datyčyć słavianskaha kirunku, to, pavodle danych DeepState, rasijskija vajskoŭcy ŭžo pačali pranikać u Mikałajeŭku, što za 6 kiłamietraŭ ad horada, a taksama sprabujuć zamacavacca ŭ Raj-Alaksandraŭcy.
«Praciŭnik stvaraje padmurak dla raźvićcia nastupalnych dziejańniaŭ na Słaviansk i Kramatorsk… U pryvatnaści, adbyvajecca źniščeńnie haradoŭ i ahłamieracyi pastajannymi abstrełami», — padsumoŭvajuć analityki DeepState.
Ministerstva abarony Rasii ciaham žniŭnia zajaviła pra zachop 15 nasielenych punktaŭ Danieckaj vobłaści, u tym liku Hańniŭki, jakaja znachodzicca za 2 kiłamietry ad Dabrapolla, Piatroŭki — za 6 kiłamietraŭ ad Družkaŭki, Arychuvatki — za 8 kiłamietraŭ ad Słavianska i Pieršamarjeŭki — za 6 kiłamietraŭ ad Kramatorska.
Imavierna, šturm hetych haradoŭ Rasija pasprabuje arhanizavać užo padčas najbližejšaj vosieńska-zimovaj kampanii. Čym bolš strataŭ paniasuć rasijskija vojski pry šturmie hetych haradoŭ, tym bolšaja imaviernaść taho, što rasijski zachopnicki paryŭ vyhaśnie i tady vajna spynicca.
Ciapier čytajuć
«Kajłas, ja idu». Što za biełaruska źnikła ŭ žudasnym sieli ŭ Niepale9
Kamientary
ale toje hučyć nadta pa saviecku, tamu hubašlepy mudrahielać niejkija eŭfiemizmy.