Čym ciapier zajmajucca dziaŭčaty, jakich letaś nazvali samymi pryhožymi ŭ Biełarusi?

Pahladzieli, jak składvajecca žyćcio paśpiachovych udzielnic «Mis Biełaruś». 

Alena Kučaruk, Alija Karotkaja i Lizavieta Łahodzič. Foty ź ich instahramaŭ

Alona Kučaruk, «Mis Biełaruś»

Alona Kučaruk, jakuju letaś pryznali hałoŭnaj pryhažuniaj krainy i dali karonu «Mis Biełaruś», vyrašyła, što choča śpiavać. Što, darečy, nie vielmi ździŭlaje, bo dziaŭčyna advučyłasia ŭ Navapołackim dziaržaŭnym muzyčnym kaledžy na dyryžorku — sioleta atrymała dypłom.

Alona Kučaruk. Fota ź jaje instahrama

Tamu ŭ lipieni jana pajšła na kastynh muzyčnaha šou BT «Faktar.baj». Aceńvała jaje žury, u składzie jakoha byli śpiavački Hiuneš dy Halina Šyškova. Ci prajšła Alona ŭ prajekt, pakul nieviadoma. 

Taksama pryhažunia sioleta była abituryjentkaj. Pastupiła jana ŭ Biełaruski dziaržaŭny ŭniviersitet kultury i mastactvaŭ na śpiecyjalnaść «sacyjalna-kulturnaja dziejnaść».

Alona Kučaruk. Fota ź jaje instahrama

Udzielničaje i ŭ ideałahičnych mierapryjemstvach — naprykład, chadziła na Minski haradski forum maładych śpiecyjalistaŭ «Čas dziejničać».

Alona Kučaruk. Fota ź jaje instahrama

Alija Karotkaja, pieršaja vice-mis

Alija całkam skancentravałasia na konkursach pryhažości — jana ci ŭdzielničaje ŭ ich, ci siadzić u žury. Nie hrebuje sudzić takija mierapryjemstvy, jak «Mis kryminalna-vypraŭčaj sistemy» (a potym robić raspakoŭki padarunkaŭ, jakija atrymała jak sudździa).

Alija Karotkaja. Fota ź jaje instahrama

Nu a ŭ chutkim časie dziaŭčyna palacić pradstaŭlać Biełaruś na «Mis Suśviet».

Darečy, paśla pośpiechu Alii na «Mis Biełaruś 2025» jaje maci Dzijana stvaryła brend adzieńnia «Kiali». Alija ciapier nazyvaje siabie jaho dyzajnierkaj i rehularna pijaryć sukienki.

Alija Karotkaja. Fota ź jaje instahrama

A jašče jana rychtujecca prabiehčy paŭmarafon. 

Taćciana Marčuk, druhaja vice-mis

Na «Mis Biełaruś» pra dziaŭčynu kazali niejak abciakalna. Pra vučobu ni słova, zatoje skazali pra maru kali-niebudź pracavać ź dziećmi. A pracavała tady 19‑hadovaja pretendentka na karonu strachavoj ahientkaj u «Biełdziaržstrachu». 

Padobna, Taćciana amal adrazu z podyumu trapiła ŭ słužbu pratakołu Łukašenki. Mienš čym praz dva miesiaca dziaŭčyna razam ź inšymi pryhažuniami sustrakała palityka ŭ Mazyry. Toj uračysta adkryvaŭ paśla rekanstrukcyi most praz Prypiać — kali jašče tamtejšych ludziej nie puskali.

Taćciana Marčuk pieršaja sprava

Viadoma, jana ŭdzielničała ŭ tradycyjnym łukašenkaŭskim bali dy pryjšła na jaho pryjom u Stary Novy hod. 

Taćciana Marčuk. Fota ź jaje instahrama

U intervju mazyrskaj rajoncy Taćciana razvažała na temu taho, ci źmianiajecca žyćcio paśpiachovaj udzielnicy konkursu pryhažości «na 360 hradusaŭ». 

Dziaŭčyna pryznała, što paśla «Mis Biełaruś» u jaje źjaviłasia «davoli šmat cikavych mierapryjemstvaŭ, jakija dajuć mahčymaść paznajomicca z hodnymi ludźmi».

A sioleta 3 lipienia Taćciana apublikavała fota na fonie Pałaca Niezaležnaści. Pačynaŭsia dopis sa słoŭ, što heta «dzień, kali asabliva adčuvaješ słova «dom», a zakančvaŭsia zachapleńniami «ćviordaj pazicyjaj» dy «kałasalnymi namahańniami» Łukašenki.

Zaraz pryhažunia rychtujecca pajechać u Tajłand na «Mis hłobał». 

Lizavieta Łahodzič, «Mis siabroŭstva» i «Top-madel»

U vizitkach «Mis Biełaruś» čamuści pryniata chavać samyja zvyčajnyja fakty ź bijahrafii ŭdzielnic, jakija byccam by nie vielmi pasujuć pryncesam. 

Tak, pra Lizavietu raspaviali, što jana zajmałasia sportam — dy nakidali pustych pryhožych słoŭ, čamuści zabyŭšysia pra adukacyju i pracu. 

A dziaŭčyna skončyła Biełaruski dziaržaŭny ŭniviersitet charčovych i chimičnych technałohij i atrymała dypłom inžyniera-technołaha. Pa raźmierkavańni pajšła na ahrakambinat «Dziaržynski».

Lizavieta Łahodzič. Fota ź jaje instahrama

Ciapier Lizavietu taksama pačali klikać na roznyja dziaržaŭnyja iventy — naprykład, na žanočuju dypłamatyčnuju sustreču, jakuju ładziła žonka ministra zamiežnych spraŭ Natalla Ryžankova. 

Dziaŭčyna aktyŭna ŭdzielničaje ŭ mierapryjemstvach Nacyjanalnaj škoły pryhažości, siadzić u žury konkursaŭ, nu i viadoma baluje na balach. 

Lizavieta Łahodzič. Fota ź jaje instahrama

Hanarycca bratam Ramanam, jaki vučycca ŭ Akademii MUS. 

Lizavieta Łahodzič z bratam. Fota ź jaje instahrama

Kryścina Bielskaja, «Mis simpatyj hledačoŭ»

Minčanku Kryścinu Bielskuju prezientavali jak nastaŭnicu anhlijskaj movy, jakaja maryć stać ściuardesaj. Ale ž u svaim instahramie dziaŭčyna jašče da «Mis Biełaruś» pazicyjanavała siabie jak madel. 

Kryścina Bielskaja. Skrynšot jaje instahrama

Faktyčna Kryścina daŭno abrała šlach Uładleny Zajcavaj. Jak i jana, Kryścina źjaŭlałasia pierad vačyma Łukašenki padčas «Słavianskaha bazaru» dy na śviacie ŭ Aleksandryi.

Kryścina Bielskaja. Skrynšot jaje instahrama

U pryncypie, paśla konkursu dla dziaŭčyny ničoha nie źmianiłasia. Jana sustrakała chlebam-sollu haściej ź Iraka, udzielničała ŭ dziaržaŭnych mierapryjemstvach — heta kali pryhažuni na vysokich abcasach padnosiać mužčynam papierki na podpis ci kvietki dla ŭračystaha ŭručeńnia.

Kryścina Bielskaja źleva. Skrynšot jaje instahrama

U volny čas pijaryła imianny bombier ź firmovaj kramy Łukašenki. 

Letaś źniałasia ŭ klipie biełaruskaha śpievaka Mikity Bialko. 

Sioleta jana praciahnuła ŭdzielničać u praŭładnych mierapryjemstvach — naprykład, u akcyi «Śpiajom himn razam». A taksama zaśviaciłasia na «Mis Viva Braslav» — pryčym u biełaruskim mierčy.

Kryścina Bielskaja. Skrynšot jaje instahrama

A taksama Kryścina Bielskaja pačała vieści telehram-kanał, pryśviečany padarožžam pa Biełarusi.

Alaksandra Kulčyk, «Mis fota»

Na momant konkursu pryhažości dziaŭčyna źjaŭlałasia druhakurśnicaj Biełaruskaha dziaržaŭnaha ŭniviersiteta infarmatyki i radyjoelektroniki.

Alaksandra nie pieršaja ŭ siamji, chto pajšoŭ šturmavać «Mis Biełaruś». U 2012 hodzie ŭ konkursie pryhažości ŭdzielničała jaje stryječnaja siastra Dzina Žukoŭskaja. (Kleckaja rajonka z hetaj nahody napisała: «U 2012 hodzie Dzina Žukoŭskaja zrabiła dla Kleckaha rajona amal toje ž, što Juryj Haharyn zrabiŭ dla SSSR: jana była pieršaj tam, dzie našych jašče nie było».). Nijakaha miesca taja nie atrymała, zatoje paśla jašče nie adzin hod zdymałasia ŭ rekłamie.

Alaksandra Kulčyk na łukašenkaŭskim bali. Skrynšot jaje instahrama

Alaksandra Kulčyk kazała, što mienavita prykład siastry matyvaŭ i jaje padacca na «Mis Biełaruś». 

Alaksandra Kulčyk. Fota ź jaje instahrama

Jak bačym, vynik bolš paśpiachovy. Praŭda, Alaksandra nie vielmi lubić pakazvać svajo žyćcio ŭ sacyjalnych sietkach. Jana praciahvaje siabravać ź inšymi ŭdzielnicami konkursu i ŭdzielničaje ŭ modnych pakazach. 

Kamientary da artykuła