Zialenski zajaviŭ, što pastaviŭ zadaču zapuskać pa Rasii tysiaču dronaŭ za dzień
«Asnoŭnaje — naša abarona ad reaktyŭnych «šachiedaŭ» i zrabić našy dalnabojnyja ŭdary pa Rasii jašče bolš častymi», — skazaŭ prezident Ukrainy.
Uładzimir Zialenski. Fota: UNIAN
Uładzimir Zialenski ŭ piatnicu zajaviŭ, što pastaviŭ pierad ukrainskimi vajskoŭcami zadaču zapuskać pa Rasii tysiaču dronaŭ na dzień.
«Siońnia [u piatnicu] pravioŭ pasiadžeńnie Staŭki. Hałoŭnaje — maksimalna naraścić vytvorčaść našaj zbroi dla abarony ad rasijskich udaraŭ pa Ukrainie. Asnoŭnaje — naša abarona ad reaktyŭnych «šachiedaŭ» i zrabić našy dalnabojnyja ŭdary pa Rasii jašče bolš častymi. Zadača — tysiača dronaŭ dla dalnabojnych sankcyj za dzień pa Rasii. Zaraz u siarednim 300 plus našych dalnabojnych sankcyj, pavinna być bolš», — zajaviŭ Zialenski.
Zialenski dadaŭ, što «meta całkam kankretnaja» i Ukraina «vykanaje hetuju zadaču».
U pačatku lipienia Zialenski adznačaŭ u intervju Financial Times, što klučavaja faza vajny pieramiaściłasia z sušy i mora ŭ pavietra, i vykazvaŭ mierkavańnie, što mienavita «bitva ŭ niebie» vyznačyć vynik kanfliktu, nahadvaje «Mieduza».
«Kali ŭ bok Maskvy palacić užo nie sto dronaŭ, a tysiača, jon [Uładzimir Pucin] zrazumieje. Kali jon pačnie adčuvać heta asabista, kali pačnie bačyć heta ŭłasnymi vačyma… daradcy buduć pierakonvać jaho pierajechać kudy-niebudź za Urał. Čym dalej Pucin budzie ad Maskvy, tym bližej budzie kaniec vajny», — skazaŭ Zialenski.