Pamierła Halina Filipaŭna z Hrodna, jakoj letam 2020 hoda na ŭsiu krainu aburaŭsia Łukašenka
Halinie Andrejčyk było 87 hadoŭ.
Halina Andrejčyk. Fota: Radyjo Svaboda
Pra Halinu Filipaŭnu Andrejčyk kraina daviedałasia šeść hadoŭ tamu, 29 maja 2020 hoda.
81‑hadovaja žančyna, vieteran pracy, vyjšła na płošču ŭ Hrodnie i dała kranalnaje intervju Siarhieju Cichanoŭskamu.
Błohier abniaŭ babulu, a taja nazvała jaho ŭ adkaz «synkom». Taksama žančyna vykazałasia pra situacyju ŭ Biełarusi.
«Dziakuj, što vyjšli na vulicu. Nie bojciesia. Nie bojciesia. Kali ja pamru, ja ŭsio ž budu viedać, što zrabiła hłytok svabody. Dziakuj tabie, dzietańka, dziakuj tabie, synočak», — skazała padčas strymu sivaja žančyna.
U toj samy dzień Siarhieja Cichanoŭskaha ŭ vyniku pravakacyi zatrymali, na volu joj vyjšaŭ tolki praź piać hadoŭ.
Ale 4 červienia na Halinu Filipaŭnu źviarnuŭ uvahu Łukašenka, jaki ŭ svajoj tradycyjnaj hreblivaj maniery vykazaŭsia pra žančynu, jakaja nibyta «kryčała, harłała» i žyvie ŭ «pałacy».
«Čaho tabie nie chapaje?» — zadaŭsia jon pytańniem.
Viečaram taho ž dnia ŭ efiry BT pakazali dom žančyny z drona ahučyli na ŭsiu krainu śpis jaje majomaści: kvatera ŭ centry Hrodna, «katedž» — jak jany vyrazilisia, «dźvie niedabudavanyja fazendy», mikraaŭtobus-«trochhodka» minimum za 25 tysiač dalaraŭ.
Halina Filipaŭna potym raskazała žurnalistam niezaležnych ŚMI, što ckavańnie mocna ŭzrušyła jaje, i jana žyła na snatvornym i supakajalnych.
Halina Andrejčyk raskazvała, što sapraŭdy ŭ jaje jość dom, jaki jana pabudavała ŭ 1990‑ch hadach. Dom budavali 38 hadoŭ, svaimi rukami. Hrašyma siamji dapamahali svajaki z Aŭstralii. Dziadźka Uładzimir i ciotka Alina emihravali tudy paśla apošniaj vajny.
Žančyna tłumačyć, što staž u jaje — 52 hady, jana vykładała ekanamičnuju teoryju ŭ hrodzienskich univiersitetach. Za hety čas aščadžała hrošy, adkłała sabie na pachavańnie $5 tysiač, kab rodnyja mahli ź joj narmalna raźvitacca. Dvoje synoŭ u 2020 hodzie žyli i pracavali ŭ Rasii. A druhi dom na ŭčastku budavaŭsia dla nastupnaha pakaleńnia siamji.
Halina Andrejčyk aburałasia, što jaje pryvatnuju terytoryju pakazali z dronu biez dazvołu: «Ci ž heta možna rabić, skažycie? Čym čałaviek bahaciejšy, tym i kraina budzie bahaciejšaja».
Halina Filipaŭna pamierła 16 lipienia 2026 hoda. Joj było 87 hadoŭ. Pachavanaja na mohiłkach u vioscy Auls la Hrodna.