«Ja nie śviataja, ale ŭ mianie nie było nadziejnaha plača pobač»: maci Ksiušy z SMA mohuć pazbavić baćkoŭskich pravoŭ, jana ž davodzić, što zdolnaja vypravicca

Adnaznačnaha mierkavańnia, ci varta viartać dziaŭčynku rodnaj maci, niama navat siarod vałancioraŭ, jakija dapamahajuć siamji.

Ksiuša z mamaj. Skrynšot videa, jakaść palepšanaja z dapamohaj ŠI

Sudovaje pasiadžeńnie ab pazbaŭleńni Niny Sańkovaj baćkoŭskich pravoŭ musiła adbycca jašče ŭ krasaviku — ale ž tady praces aficyjna pastavili na paŭzu, kab Ksiuša zmahła spakojna atrymać vyratavalny ŭkoł Zolgensma. Maci była ź joj u RNPC «Maci i dzicia» ŭ toj składany momant.

Ciapier Ksiuša znoŭ znachodzicca ŭ dziciačym domie, a pracedura pazbaŭleńnia baćkoŭskich pravoŭ zapuščanaja — novaje sudovaje pasiadžeńnie pryznačana na 8 vieraśnia.

Nina šukaje dapamohi i zapisała videazvarot. Jana pryznajecca, što vielmi baicca dnia iks, ale ž adznačaje, što nie zdajecca. Zapeŭnivaje, što dom i sielskahaspadarčyja pabudovy pryviedzienyja ŭ paradak. Pry hetym adznačaje, što ŭsio heta dziakujučy dapamozie vałancioraŭ.

Kaža, što źbirała nieabchodnaje dla dziaciej u škołu. U žniŭni Ninu puścili da starejšaj dački, kab maci pavinšavała jaje z dniom naradžeńnia — usiaho na 20 chvilin, pry hetym zabaranili fatahrafavać dzicia.

Žančyna raspaviadaje, što ź jaje i biez taho nievialikich zarobkaŭ utrymlivajuć amal 90% na ŭtrymańnie dziaciej. Nina ščyra pryznajecca, što viedaje: hramadstva jaje asudžaje i ličyć žudasnaj maci, ale prosić parazumieńnia.

U Sańkovaj było nie samaje prostaje žyćcio. Jana vyrasła ŭ dziciačym domie, naradziła pieršy raz u 17 hadoŭ. Ninu ź niemaŭlom pasialili da rodnaj maci, ale taja, akramia taho, što mieła psichijatryčnyja prablemy, jašče i mocna piła.

«Ciapier mama ŭ remisii, ale ja bajusia, što jana sarviecca. Časam ja dumaju: heta mnie takoje pakarańnie ci dapamoha? Ale ja nie skardžusia, ja prosta sprabuju vyžyć i viarnuć dziaciej. Ja nie pju. I ja nie kidała svaich dziaciej — ja prasiła dapamohi, kali nie davała rady. Moj były muž piŭ, biŭ mianie, praz heta my stajali na ŭliku. Paśla śmierci baćki Ksiušy (jon skončyŭ žyćcio samahubstvam. — NN) i jaje dyjahnazu mnie prapanavali časova ŭładkavać Ksiušu ŭ dziciačy dom. Ja była ciažarnaja, pahadziłasia, dumajučy, što heta nienadoŭha, ale zabrali ŭsich. U mianie nie było hrošaj i sił, a ciapier mianie chočuć nazaŭsiody pazbavić baćkoŭskich pravoŭ».

Nina prosić pahladzieć na jaje nie jak na niadobranadziejnuju maci, a jak na žančynu, jakaja zmahajecca. Kaža, što joj patrebny nie žal, a spraviadlivaść.

Žančyna dziakuje supracoŭnikam dziciačaha doma za kłopat pra Ksiušu, ale padkreślivaje, što maryć sama zajmacca dačkoj, vazić jaje na reabilitacyi i bačyć, jak taja ŭśmichajecca.

«Ja nie śviataja, ale ŭ mianie nie było padtrymki i nadziejnaha plača pobač. U mianie nie było takoha prykładu, ale ja vučusia. Ja słuchaju parady ludziej, jakija mnie dapamahajuć, padtrymlivajuć… I ja vielmi chaču navučycca žyć pravilna».

Nina raspaviadaje, što sprabavała dahrukacca i da čynoŭnikaŭ, i da Biełaruskaha sajuza žančyn — ale pakul biez asablivych vynikaŭ.

Jana apublikavała miłyja videa, jak hulaje z Ksiušaj, jak vinšuje dačku z dniom naradžeńnia — a dziaŭčynka ščaślivaja.

Ksiuša z mamaj. Skrynšoty videa, jakaść palepšana z dapamohaj ŠI

Ale ž navat siarod vałancioraŭ niama adnaznačnaha bačańnia taho, jak lepš zrabić u takoj składanaj situacyi. Mierkavańni padzialilisia pryblizna 50 na 50.

Adny ličać, što viartać Ksiušu maci nielha kateharyčna. Jany ŭpeŭnieny, što pobytavyja ŭmovy ŭ Niny daloka nie samyja lepšyja, a sama jana nie vielmi hatova karektavać svoj ład žyćcia. A havorka idzie ŭ pieršuju čarhu pra ciažkachvoraje dzicia, jakomu patrebna dobraje charčavańnie i kateharyčna nie pasujuć antysanitarnyja ŭmovy.

Prychilniki žorstkich mieraŭ pytajucca: ci sapraŭdy niechta hatovy ŭvieś čas znachodzicca pobač ź Ninaj i kantralavać jaje pavodziny? Jany ŭpeŭnieny, što varta było b znajści dla Ksiušy novuju siamju, jakaja b kłapaciłasia pra dziaŭčynku.

Druhaja častka vałancioraŭ usio ž choča vieryć, što Nina zmoža narešcie stać dobraj maci. Jany apielujuć da taho, što niehumanna było davać žančynie i Ksiušy nadzieju, dapamahać navieści doma paradak, kab potym pazbavić Sańkovu baćkoŭskich pravoŭ.

Nahadajem, sioleta historyja maleńkaj dziaŭčynki Ksiušy Maisiejenka abjadnała ŭsiu Biełaruś. Dziakujučy nieabyjakavym vałancioram, kraina daviedałasia pra trochhadovuju dziaŭčynku z SMA, jakaja žyvie ŭ dziciačym domie ŭ Mahilovie. Jana była amal pazbaŭlenaja šansaŭ na vyratavańnie — u adroźnieńnie ad inšych dziaciej z takoj ciažkaj chvarobaj za Ksiušu nie było kamu zmahacca.

Sabrać $1,8 miljona na vyratavalny ŭkoł samych darahich lekaŭ u śviecie — vielmi składanaja zadača dla luboj biełaruskaj siamji. A što kazać pra dzicia, jakoje zastałosia sam-nasam z prablemaj?..

Ale nieabyjakavyja ludzi pačali pijaryć zbor na Ksiušu. U vyniku kaśmičnuju sumu ŭdałosia sabrać za rekordny čas — za miesiac. Nivodzin padobny zbor u historyi Biełarusi nie adbyvaŭsia nastolki chutka.

U historyi źjaviłasia i mama dziaŭčynki — Nina Sańkova, jakaja raspaviała svaju praŭdu.

Nina Sańkova. Skrynšot videa, jakaść palepšanaja z dapamohaj ŠI

Na toj momant Ninie było 29 hadoŭ, jana žyła ŭ ahraharadku prykładna za 100 kiłamietraŭ ad Mahilova dy pracavała apieratarkaj mašynnaha dajeńnia. U žančyny čaćviora dziaciej (Ksiuša ź ich treciaja), ale ŭsie jany žyli nie z maci. Starejšaja dačka i małodšy syn znachodzilisia pad časovaj apiekaj u inšaj siamji, druhaja dačka žyła sa svaim tatam. A Ksiuša — u Domie dziciaci, kudy maci zdała jaje, bo nie davała rady situacyi.

Byŭ jašče niuans: kali Nina sprabavała samastojna źbirać hrošy na lačeńnie dački, jaje abvinavačvali ŭ tym, što danaty žančyna častkova traciła na siabie.

U vyniku ŭsio ž Nina zajaviła, što choča adnavicca ŭ baćkoŭskich pravach i samastojna hadavać svaich dziaciej. Sioleta ŭ sakaviku ŭ intervju «Anłajnieru» žančyna zapeŭnivała, što ŭ jaje doma ŭžo amal usio zroblena dla taho, kab viarnuć dziaciej — u tym liku i Ksiušu. Žančyna kazała, što praź miesiac usie buduć ź joj.

Ale nasamreč situacyja była daloka nie takaja aptymistyčnaja. Śviedki kazali, što za apošnija paŭhoda maci nie zrabiła ničoha, kab davieści dom da ładu. U vyniku toje, što było zroblena, rabiłasia ŭ asnoŭnym vałanciorami.

Kamientary da artykuła