Syn Nietańjachu terminova viarnuŭsia z ZŠA praz pahrozu
Iranskija ahienty znachodzilisia ŭ Majami, sačyli za jaho domam i pieramiaščeńniami, śćviardžaje adzin z kanałaŭ.
Bieńjamin Nietańjachu i jaho syn Jair. Fota: Aleksey Nikolskyi / Sputnik Kremlin Pool Photo via AP, File
Syn premjer-ministra Izraila Jair Nietańjachu byŭ terminova vyviezieny z Majami ŭ Izrail praz surjoznuju pahrozu jaho biaśpiecy, paviedamlaje Bild.
Heta paćvierdziła izrailskaja śpiecsłužba Šyn-Bet. «Sapraŭdy isnavała značnaja niebiaśpieka. Paśla acenki situacyi było vyrašana terminova viarnuć jaho ŭ Izrail razam z hrupaj achovy», — havorycca ŭ zajavie śpiecsłužby.
Telekanał Newsmax sa spasyłkaj na krynicu ŭ amierykanskich pravaachoŭnych orhanach śćviardžaje, što naprykancy minułaha hoda Jair Nietańjachu staŭ cellu mierkavanaha iranskaha płana zamachu.
Pavodle danych kanała, iranskija ahienty znachodzilisia ŭ Majami, sačyli za jaho domam i pieramiaščeńniami. Paśla hetaha Nietańjachu-małodšamu, jak śćviardžajecca, zahadali nieadkładna źjechać, i jon pakinuŭ ZŠA, nie zabraŭšy asabistyja rečy.
Šyn-Bet pry hetym nie paćvierdziŭ, što pahroza sychodziła mienavita ad Irana. Raniej Bieńjamin Nietańjachu publična zajaŭlaŭ, što Tehieran sprabavaŭ zabić adnaho ź jaho synoŭ, ale nie ŭdakładniaŭ, kaho mienavita.
Na hetym tydni sakratar Vyšejšaj rady nacyjanalnaj biaśpieki Irana Machsien Rezai taksama publična pahražaŭ samomu Nietańjachu.«My adpravim Bieńjamina Nietańjachu, premjer-ministra sijanisckaha režymu, u piekła», — zajaviŭ jon.