U Astraŭcy hałoŭnaja buchhałtarka skrała ŭ dziaržustanovy bolš za 100 tysiač rubloŭ
Jana prahulała ich u anłajn-kazino.
U Astraŭcy zatrymali 35‑hadovuju hałoŭnuju buchhałtarku adnoj ź dziaržaŭnych arhanizacyj, jakaja na praciahu paŭhoda sistematyčna vykradała biudžetnyja srodki.
Pavodle MUS, žančyna vykarystoŭvała niekalki schiem. Jana pieranakiroŭvała hrošy ŭstanovy na ŭłasnuju bankaŭskuju kartku pad vyhladam zakupak haspadarčych tavaraŭ i apłaty pasłuh, unosiačy falšyvyja źviestki ŭ spravazdačnuju dakumientacyju. Častku najaŭnych hrošaj, jakija pastupali ŭ arhanizacyju, buchhałtarka prosta nie pravodziła praz kasu i zaličvała na svoj asabisty rachunak.
Ahulnaja suma pryčynienaj škody pieravysiła 100 tysiač rubloŭ.
Skradzienyja srodki žančyna marnavała na staŭki ŭ anłajn-kazino.
Zaviedziena kryminalnaja sprava za vykradańnie šlacham złoŭžyvańnia słužbovymi paŭnamoctvami ŭ asabliva bujnoj sumie. Joj pahražaje da 12 hadoŭ pazbaŭleńnia svabody.