U dzień naradžeńnia Adesy Rasija masiravana atakavała horad
U noč na 2 vieraśnia, kali Adesa adznačaje svajo 232-hodździe, rasijskaja armija atakavała horad i vobłaść. Paškodžanyja žyły šmatpaviarchovik, biźnies-centr, navučalnyja ŭstanovy i enierhietyčnaja infrastruktura. Pavodle miascovych uładaŭ, paciarpieli vosiem čałaviek, siarod ich dzicia.
Rasijskija vojski nanosili ŭdary pa Adesie i vobłaści ciaham usioj nočy. Pad ataki trapili cyvilnyja i enierhietyčnyja abjekty.
U 24‑paviarchovym žyłym domie paškodžanyja kvatery z 17‑ha pa 23‑ci pavierch. Vybuchovaja chvala taksama paškodziła aŭtamabili, pryparkavanyja pobač. U susiednich damach vybiła vokny.
U inšaj častcy horada paškodžanyja fasad i škleńnie biźnies-centra. U ofisnych pamiaškańniach uspychnuŭ pažar, paciarpieli aŭtamabili.
Razbureńni zafiksavanyja taksama na terytoryi pryvatnaha pradpryjemstva i ŭ dačnym domie. Paškodžany transpart, całkam źniščana aŭtazapravačnaja stancyja. Akramia taho, paciarpieli dźvie navučalnyja ŭstanovy.
Kiraŭnik Adeskaj haradskoj vajskovaj administracyi Siarhiej Łysak paviedamiŭ pra vosiem paciarpiełych, u tym liku adno dzicia.
Pažary, jakija ŭźnikli paśla ŭdaraŭ, patušyli. Na miescach pracavali taksama psichołahi i kamunalnyja słužby.
2 vieraśnia Adesa adznačaje dzień horada — sioleta joj spaŭniajecca 232 hady.