«Mierkavana, zahinuŭ. Evakujavać niemahčyma». Minski adździełačnik Alaksiej nie vierniecca z vajny suprać Ukrainy
Baćki Alaksieja Bahatava pajšli ŭ sud, kab pryznać jaho źnikłym bieź viestak i chutčej atrymać vypłaty.
Alaksiej Bahataŭ. Fota: Belpol
Biełarus Alaksiej Bahataŭ, jaki vajavaŭ za Rasiju, byŭ paranieny askiepkam ukrainskaha snarada. «Praz atrymanaje ranieńnie, jak miarkujecca, zahinuŭ. Akazać miedycynskuju dapamohu ci evakujavać mahčymaści nie było», — adspravazdačyłasia jaho kamandavańnie.
Baćki biełarusa, Michaił Bahataŭ i Taćciana Bahatava, pajšli ŭ rasijski sud, kab aficyjna pryznać syna źnikłym bieź viestak. Svaju matyvacyju nie chavali — «dla atrymańnia sacyjalnych i strachavych vypłat, harantavanych dziaržavaj». Ich pažadańnie vykanali.
Alaksiej Bahataŭ naradziŭsia ŭ Minsku 26 lipienia 1986 hoda. Pracavaŭ adździełačnikam u budaŭničaj kampanii «LuksBudRamont», paśla ličyŭsia dyrektaram u siamiejnym pradpryjemstvie «Bahatava», jakoje akazvała buchhałtarskija pasłuhi.
Ź ciaham času Bahataŭ pierabraŭsia ŭ Rasiju. Pierad adpraŭleńniem na śmierć jon byŭ prapisany ŭ vioscy Vialikija Aziartycy za 120 km ad Sankt-Pieciarburha, niedzie tam i pracavaŭ.