Estonija pieraviała 70 miljonaŭ jeŭra italjanskaj kampanii dla zakupki bojeprypasaŭ dla Ukrainy. Snaradaŭ u vyniku nul
Ministr abarony Estonii Chana Pieŭkur 2 vieraśnia zajaviŭ pra svaju adstaŭku, uziaŭšy na siabie palityčnuju adkaznaść za situacyju ŭ śfiery abarony krainy. Pryčynaj staŭ skandał vakoł zakupki krainaj bojeprypasaŭ dla Ukrainy, piša Ekspress.delfi.ee.
Chana Pieŭkur. Fota: AP Photo/Alex Brandon
Dziaržaŭny centr abaronnych inviestycyj Estonii (RKIK) pieraličyŭ 70 miljonaŭ jeŭra avansu italjanskaj kampanii Datasel S.R.L. Adnak vyśvietliłasia, što heta faktyčna firma-pustyška, za jakoj stajać pradprymalniki ź Indyi. Jak paviedamlaje vydańnie Eesti Ekspress, kampanija dahetul nie pradała nivodnaha snarada.
Pieŭkur zajaviŭ, što ministr abarony nie zajmajecca niepasrednymi pieramovami pa kantraktach i nie praviaraje kožnuju detal zakupak. Pavodle jaho, vybar kankretnych pastaŭščykoŭ i padrychtoŭka kantraktaŭ naležać da abaviazkaŭ RKIK.
Pry hetym ministr pryznaŭ, što jak kiraŭnik viedamstva jon usio ž niasie palityčnuju adkaznaść za ŭsiu śfieru abarony. Tamu jon hatovy pakinuć pasadu i zajaviŭ, što ciapier premjer-ministr pavinien znajści jamu zamienu.
Pieŭkur uznačalvaje Ministerstva abarony Estonii z 2022 hoda. Jaho adstaŭku jašče pavinien zaćvierdzić parłamient — Ryjhikohu. Vosieńskaja siesija parłamienta pačniecca 14 vieraśnia, tamu da hetaha času Pieŭkur praciahnie vykonvać abaviazki ministra.
Čytajcie taksama:
Źjavilisia novyja žachlivyja videa momantu vybuchu na składzie bojeprypasaŭ pad Kijevam 28 žniŭnia
U Jeŭropie sprabavali padarvać čaćviorty za miesiac vajskovy zavod