Ci praŭda, što z hadami čałaviek pačynaje pachnuć inakš? Voś što kaža navuka

Z uzrostam pach cieła sapraŭdy mianiajecca — pryčym hetyja źmieny mohuć pačynacca ŭžo paśla 40 hadoŭ. Adkul biarecca tak zvany «pach staraści», ci možna ad jaho pazbavicca i ci sapraŭdy jon taki niepryjemny, jak pryniata ličyć, tłumačyć The Guardian.

Ilustracyjny zdymak. Fota: Naša Niva

Pryčyna źmieny pachu z uzrostam — u naturalnych chimičnych pracesach, jakija adbyvajucca ŭ skury.

Jak piša The Guardian, navukoŭcy navat vyznačyli adno z rečyvaŭ, adkaznych za charakterny ŭzrostavy pach. Jano ŭtvarajecca pry akiśleńni i raspadzie peŭnych skurnych tłuščaŭ i nazyvajecca 2-nonienal. I heta absalutna naturalnaja i niepaźbiežnaja źmiena.

Adkul biarecca hety pach

Jak tłumačać ekśpierty, skura čałavieka pakrytaja tonkim słojem naturalnych tłuščaŭ — lipidaŭ. Jany dapamahajuć joj zastavacca miakkaj, abaraniajuć ad straty vilhaci i ŭździejańnia navakolnaha asiarodździa.

U skład lipidaŭ uvachodziać tłustyja kisłoty. Z uzrostam ich skład mianiajecca, a zdolnaść skury supraćstajać štodzionnym paškodžańniam pastupova źnižajecca. Skurnyja tłuščy stanoviacca bolš uraźlivymi da akiśleńnia. Kali jany raspadajucca, utvarajecca ŭ tym liku 2‑nonienal — rečyva z charakternym pacham.

Pry hetym kolkaść 2‑nonienalu ŭ roznych ludziej adroźnivajecca. Navukoŭcy pakul dakładna nie viedajuć, čamu ŭ adnych jaho pach adčuvajecca macniej, čym u inšych. Na heta mohuć upłyvać skład skurnaha tłušču, hienietyka, mikrabijom skury, hihijeničnyja zvyčki, adzieńnie, stan zdaroŭja i navakolnaje asiarodździe.

Pačynajecca nie ŭ staraści

Samaje cikavaje, što źviazanyja z uzrostam źmieny pachu mohuć pačynacca tady, kali čałaviek jašče zusim nie ličyć siabie starym.

U adnym z daśledavańniaŭ, padčas jakoha navukoŭcy vyvučali skuru ludziej va ŭzroście ad 26 da 75 hadoŭ, 2‑nonienal byŭ vyjaŭleny ŭ ludziej ad uzrostu 40 hadoŭ.

Adnak heta zusim nie značyć, što čałaviek raptam u adzin dzień pačynaje pachnuć inakš. Daśledavańni pakazvajuć, što kolkaść 2‑nonienalu pavialičvajecca pastupova z uzrostam, asabliva paśla siarednich hadoŭ.

Dy i ŭvohule, ŭłasny charakterny pach majuć ludzi ŭsich uzrostaŭ. U niemaŭlataŭ pach adnosna sałodki i małočny, bo ich pachavyja załozy jašče nie pracujuć tak, jak u darosłych. Pałavoje paśpiavańnie istotna mianiaje situacyju, bo harmony spryjajuć źjaŭleńniu bolš mocnaha, muskusnaha pachu.

U darosłym uzroście pach stanovicca bolš stabilnym i ŭ značnaj stupieni zaležyć ad potu i ładu žyćcia. A paźniej da hetaha dadajucca źmieny ŭ naturalnych tłuščach skury.

A ci sapraŭdy pach pažyłych ludziej niepryjemny?

Jak adznačajuć ekśpierty, lubyja niehatyŭnyja pačućci, jakija ludzi adčuvajuć u adnosinach da «pachu pažyłych», — heta chutčej prablema ŭsprymańnia, a nie realnaści.

U 2012 hodzie daśledčyki praviali niezvyčajny ekśpierymient. Jany paprasili 41 maładoha čałavieka paniuchać majki, jakija nasili pradstaŭniki troch uzrostavych hrup: ad 20 da 30 hadoŭ, ad 45 da 55 i ad 75 da 95 hadoŭ. Udzielniki nie viedali, kamu naležała toje ci inšaje adzieńnie.

Kamanda navukoŭcaŭ była ździŭlena vynikami. Jany mierkavali, što pach budzie źmianiacca liniejna: samaja maładaja hrupa atrymaje najlepšyja adznaki, a starejšaja — najhoršyja, ale heta akazałasia nie tak.

«Pažyłyja ludzi majuć vyrazna adrozny pach cieła, ale jaho nie aceńvali jak asabliva niehatyŭny», — adznačajuć aŭtary.

Ci možna pazbavicca ad 2-nonienalu

Ekśpierty kažuć, što spynić utvareńnie 2‑nonienalu niemahčyma. Ale isnujuć sposaby, jak kantralavać hety vodar.

Vydalić častku rečyvaŭ, jakija stvarajuć pach, dapamoža rehularnaje myćcio. Adnak myła i vada nie vydalać chimičnaje złučeńnie całkam, bo jano nie prosta znachodzicca na pavierchni skury, jak pot, a vypracoŭvajecca bieśpierapynna. Dezadaranty mohuć časova maskiravać pach, ale sam 2‑nonienal jany nie vydalajuć.

Maje značeńnie i navakolnaje asiarodździe. Rehularnaje myćcio adzieńnia i paścielnaj bializny, a taksama pravietryvańnie pamiaškańniaŭ dapamahajuć nie davać pachu nazapašvacca. Pry hetym 2‑nonienal moža davoli ŭstojliva zachoŭvacca na tkaninach.

U prodažy možna sustreć i śpiecyjalnyja srodki, jakija nibyta niejtralizujuć 2-nonienal, naprykład myła z ekstraktam churmy. Jość ludzi, jakija śćviardžajuć, što takija srodki dapamahajuć, ale pierakanaŭčych navukovych dokazaŭ ich efiektyŭnaści pakul niedastatkova.

A ježa i ład žyćcia?

Ekśpierty, ź jakimi razmaŭlali žurnalisty vydańnia, miarkujuć, što pamiž utvareńniem 2-nonienalu, charčavańniem i ładam žyćcia moža isnavać suviaź. Adnak dla dakładnych vysnoŭ patrebnyja dadatkovyja daśledavańni.

Pakolki rečyva ŭźnikaje ŭ vyniku akiśleńnia, łahična źviarnuć uvahu na faktary, jakija ŭpłyvajuć na akiślalny stres. Ekśpierty rajać užyvać pradukty, bahatyja na antyaksidanty, u tym liku sadavinu i harodninu, a taksama krynicy vitaminaŭ S i Je.

Admova ad kureńnia i abarona skury ad praźmiernaha soniečnaha vypramieńvańnia taksama karysnyja dla zapavolvańnia pracesaŭ, źviazanych z akiśleńniem.

Ale śpiecyjalisty nie rajać pieratvarać baraćbu z «pacham staraści» ŭ asobnuju prablemu i tracić vialikija hrošy na śpiecyjalnuju kaśmietyku.

Źmiena pachu cieła — takaja ž naturalnaja častka stareńnia, jak źmianieńnie skury ci vałasoŭ. I navukovyja ekśpierymienty pakazvajuć, što navakolnyja zusim nie abaviazkova ŭsprymajuć hety pach tak niehatyŭna, jak prymušaje dumać stereatyp.

Kamientary da artykuła