Kitajskich błohieraŭ paviazuć pa zamkach i na «Liniju Stalina»
Ułady spadziajucca, što praź ich pryciahnuć turystaŭ.
7 vieraśnia pačniecca tydniovy rekłamny tur pa Biełarusi dla kitajskich videabłohieraŭ. Pajezdku arhanizuje Nacyjanalnaje ahienctva pa turyźmie pry padtrymcy biełaruskaha pasolstva ŭ Kitai i «Biełarusbanka», paviedamlaje BiełTA.
U prahramu ŭklučyli Mirski i Niaśvižski zamki, Stary i Novy zamki ŭ Hrodnie, siadzibu Vałovičaŭ u Śviacku i pałac Bułhakaŭ u Žyličach. Adnu noč udzielniki praviaduć u Mirskim zamku.
Błohieram taksama pakažuć nacyjanalny park «Prypiacki», zakaźnik «Aziory», Aŭhustoŭski kanał i kompleks «Haradzienski majontak «Karobčycy»». U Minsku ich paviazuć u Trajeckaje pradmieście, na płošču Svabody, da Nacyjanalnaj biblijateki, na Zybickuju vulicu i ŭ handlovyja centry.
Zapłanavanyja taksama naviedvańnie placoŭki BiełAZa kala Minskaha mižnarodnaha vystavačnaha centra i pajezdka na «Liniju Stalina».
Heta pieršy bujny prajekt Nacyjanalnaha ahienctva pa turyźmie, raźličany na prasoŭvańnie Biełarusi siarod zamiežnych turystaŭ praz błohieraŭ. Padobnyja tury płanujuć arhanizavać i dla pradstaŭnikoŭ inšych krain, jakija biełaruskija ŭłady nazyvajuć «družalubnymi».
Pavodle kiraŭnika ahienctva Kiryła Mašarskaha, za apošnija piać hadoŭ kolkaść kitajskich turystaŭ u Biełarusi pavialičyłasia ŭ 2,6 raza. Absalutnych ličbaŭ jon nie nazvaŭ.