U 2,6 raza skaracili śpis pramysłovych tavaraŭ, zabaronienych da vyvazu ź Biełarusi

U Biełarusi istotna skaracili pieralik pramysłovych tavaraŭ, vyvaz jakich za miežy krainy zabaronieny. Adpaviednyja źmieny praduhledžanyja pastanovaj Savieta Ministraŭ ad 1 vieraśnia 2026 hoda №442, apublikavanaj na Nacyjanalnym pravavym partale.

Zdymak ilustracyjny. Fota: magnific.com

Sam termin dziejańnia zabarony praciahnuć da 22 sakavika 2027 hoda, ale pry hetym śpis tavaraŭ značna skarociać — sa 199 da 77 pazicyj, subpazicyj i padsubpazicyj TN ZED JEAES.

Novyja praviły pačnuć dziejničać 23 vieraśnia 2026 hoda.

Ź pieraliku vyklučyli, u pryvatnaści, chaładzilniki i marazilniki, ciepłavyja pompy, dyzielnyja i paŭdyzielnyja ruchaviki, abstalavańnie dla vytvorčaści vina i sokaŭ, vadkasnyja pompy i padjomniki, bujnyja jomistaści dla ścisnutaha abo zvadkavanaha hazu.

Taksama zabarona bolš nie budzie raspaŭsiudžvacca na niekatoryja vidy hipsu i anhidrytu, asobnyja miedycynskija cemienty i materyjały, hruzapadjomnyja krany, a taksama peŭnyja vidy adkidaŭ i łomu karazijnaŭstojlivaj stali.

Akramia poŭnaha vyklučeńnia asobnych tavaraŭ, u mnohich hrupach pieralik taksama zvuzili. Ciapier abmiežavańnie budzie dziejničać nie dla ŭsioj tavarnaj pazicyi, subpazicyi abo padsubpazicyi, a tolki dla jaje častki.

Zabarona na vyvaz asobnych pramysłovych tavaraŭ dziejničaje ŭ Biełarusi z sakavika 2022 hoda i raniej nieadnarazova praciahvałasia. Ciapierašni termin jaje dziejańnia zakančvajecca 22 vieraśnia, paśla čaho pačnie dziejničać abnoŭleny pieralik.

Kamientary da artykuła