«Na karabli kožny dzień — paniadziełak». Biełaruska raskazała pra svaju pracu na kruiznym łajniery
Ujavicie pracu, dzie pa darozie ŭ stałovuju možna sustreć ludziej ź dziasiatkaŭ krain, dzie ty pa rabocie pabyvaješ na Karybach, u Azii, Novaj Ziełandyi. Zdajecca, idealnaja prafiesija dla čałavieka, jaki choča pahladzieć śviet. Jość tolki adna detal: pracavać daviadziecca pa dziesiać hadzin štodzień. Siem dzion na tydzień.
Jana Kuruška. Skryn videa: yakurushka / TikTok
Minčanka Jana Kuruška čatyry hady pracuje aficyjantkaj na kruiznych łajnierach i raskazvaje pra heta ŭ sacsietkach.
U tyktoku, jaki Jana viadzie z kanca 2025 hoda, u jaje amal 148 tysiač padpisčykaŭ. Jutub-kanał jana zapuściła ŭ krasaviku 2026 hoda: za niekalki miesiacaŭ jaho aŭdytoryja vyrasła da 15 tysiačy padpisčykaŭ, a 205 apublikavanych videa sumarna nabrali bolš za 16 miljonaŭ prahladaŭ.
Jak zhadvaje ŭ videa Jana, da pracy na kruiznym łajniery jana pryjšła amal vypadkova. Da hetaha dziaŭčyna pracavała ŭ śfiery hramadskaha charčavańnia ŭ Minsku i Pieciarburhu, a paśla pačatku pandemii viarnułasia ŭ Biełaruś. Joj chaciełasia znajści niešta bolš cikavaje, tamu jana pačała vyvučać vakansii na kruiznych łajnierach, znajšła ahienctva i pakinuła zajaŭku.
Praces pajšoŭ chutka: paśla dvuch sumoŭjaŭ, adno ź jakich prachodziła z pradstaŭnikami kruiznaj kampanii na anhlijskaj movie. Praź niekalki dzion Jana atrymała kantrakt i zaniałasia afarmleńniem viz i miedycynskich dakumientaŭ. Jak śćviardžaje dziaŭčyna, usio adbyłosia vielmi chutka. Zajaŭku jana padała ŭ kancy lutaha, a ŭžo 4 krasavika adpraviłasia na svoj pieršy kantrakt.
«Na kruiznych karablach u vas źjavicca šmat siabroŭ i znajomych z roznych krain. Vy zahavorycie adrazu na niekalkich movach, časam navat u adnym skazie. Vas navučać tancavać salsu i bačatu. Znojdziecie dla siabie lubimuju stravu z kožnaj kuchni śvietu.
Śviataŭ stanie našmat bolš, bo vy adznačaćmiecie nie tolki svaje, ale i śviaty inšych krain. Kožny dzień tut u kahości dzień naradžeńnia, tak što viečarynak budzie šmat. Tolki nie zabyvajciesia, što na karabli kožny dzień — jak paniadziełak», — kaža ŭ videa Jana.
Šeść miesiacaŭ biez vychadnych
Zvyčajny kantrakt na kruiznym łajniery, pavodle Jany, doŭžycca kala šaści miesiacaŭ. Paśla jaho supracoŭnik atrymlivaje prykładna dva miesiacy adpačynku, a zatym moža jechać na nastupny kantrakt. Pry hetym pracavać u toj ža kampanii nie aznačaje viartacca na toj ža karabiel.
«U nas vosiem łajnieraŭ. U kožnaha svoj ułasny maršrut. Usie jany znachodziacca ŭ roznych častkach śvietu. Tak što, naprykład, za adzin kantrakt vy možacie pahladzieć Jeŭropu i Karybskija astravy, a za inšy — Aziju, Aŭstraliju i Novuju Ziełandyju», — tłumačyć minčanka.
Ale tut ža papiaredžvaje:
«Kali vy chočacie pracavać na kruizach, budźcie hatovyja da taho, što vychadnych u vas nie budzie. Hrafik pracy — siem dzion na tydzień pa dziesiać hadzin u dzień».
Asobnuju ŭvahu dziaŭčyna źviartaje na praciahłaść kruizaŭ. Nasupierak łohicy, siamisutačnyja kruizy akazvajucca značna ciažejšymi za doŭhija. Jak tłumačyć biełaruska, hości za karotki tydzień imknucca paśpieć absalutna ŭsio: naviedać usie šou, paviačerać va ŭsich restaranach i pasprabavać jak maha bolš. Heta stvaraje vialikuju nahruzku na piersanał. Akramia taho, dzień źmieny pasažyraŭ, tak zvany embarkation day, adzin z samych składanych: treba pravodzić adnych haściej, sustreć novych i nanova zapaminać imiony i numary kajut.
Raskład supracoŭnikaŭ, pavodle Jany, mianiajecca kožny kruiz. Isnuje tak zvanaja ratacyja: hrafik raźmierkavany zahadzia, i ŭ kožnaha svaja čarha. Kamuści moža pašancavać na straight shift, kali pracuješ adnym vialikim błokam z 11 ranicy da viečara ź nievialikim pierapynkam. Inšyja ž traplajuć na split schedule, kali praca raźbita na častki: śniadanak, łanč i viačeru.
Jość i načnyja źmieny — Night Shift. Niahledziačy na toje, što pracavać davodzicca ŭsiu noč, u takich supracoŭnikaŭ zastajecca ceły dzień, kab vyjści ŭ port.
«Ale bolšaść tut pracuje nie dziela padarožžaŭ, a dziela zarobku», — zaŭvažaje Jana.
Da taho ž hrafik nie zaŭsiody dazvalaje vyjści ŭ horad, i časam davodzicca lubavacca im tolki z karabla.
«Siońnia my adpłyvajem a treciaj hadzinie. A moj pierapynak — ź dźviuch da šaści. Tamu pryjdziecca zajmacca čymści inšym. Možna pajści ŭ trenažornuju zału ci papić kavy na opendeku (adkrytaj pałubie), pahladzieć filmy, ale majo lubimaje — heta spać», — pryznajecca jana ŭ sacsietkach.
Jość i bolš istotnyja niazručnaści:
«Na łajniery ježa nie takaja, jak doma, i ŭ vas nie budzie mahčymaści pajeści što zachočacie i kali zachočacie. Śniadanak, abied i viačera pa raskładzie, tamu časam ja vybiraju paspać daŭžej zamiest taho, kab pajeści. Nie chapaje snu, sonca i śviežaha pavietra, tamu, kab narmalna siabie adčuvać, ja pju vitaminy».
Dziaŭčyna taksama raskazvaje pra strohija praviły punktualnaści. Łajnier nie čakaje nikoha. Kali supracoŭnik spaźniŭsia da času, kali treba być na borcie — zvyčajna heta za hadzinu da adpraŭleńnia, — jon moža atrymać papiaredžańnie. A kali ŭvohule nie paśpieŭ na karabiel, jaho mohuć zvolnić i adpravić dadomu z taho porta, dzie jon zastaŭsia. Čas adpłyćcia źviazany ź biaśpiekaj, partovym raskładam i vydatkami kampanii na stajanku.
Ad kavy da arhanizacyi charčavańnia
Za čas pracy abaviazki Jany mianialisia. Dziaŭčyna pracavała ŭ roznych restaranach łajniera i ŭ bary.
Zaraz naša suajčyńnica pracuje na stojcy braniravańnia restarana — Reservation Desk. Jak jana sama ŭdakładniaje, heta nie pavyšeńnie, a źmiena abaviazkaŭ pry tym ža zarobku. Jana braniruje stały ŭ restaranach, arhanizuje vinšavańni dla haściej, a taksama pracuje z zapytami tych, chto maje alerhii abo asablivyja patrabavańni da charčavańnia.
Adnym z samych kamfortnych miescaŭ Jana nazyvaje bar. Pryčyna — źmiena z 6‑j ranicy da 12 hadzin dnia. Tut nie treba ciahać ciažkija padnosy ci prybirać brudnyja talerki. Asnoŭny zaniatak — varyć kavu i razmaŭlać z haściami.
Mnohija ź ich zachodziać u bar rehularna, tamu z časam Jana viedaje pra ich mnohaje: ad taho, adkul jany, da imia ich sabaki. Važna taksama pamiatać, chto lubić padvojny šot espresa, a chto pje ajs-łate. Takaja ŭvaha moža adbivacca i na čajavych. Chacia a šostaj ranicy padtrymlivać razmovu z haściami, pavodle Jany, chočacca nie zaŭsiody.
Što adbyvajecca, kali zachvareć
Na borcie jość miedycynski centr, dzie pracujuć doktar i miedsiostry. Kali ŭ supracoŭnika tempieratura, atručeńnie abo prastuda, jamu mohuć dać leki i na niekatory čas vyzvalić ad pracy. Hałaŭny bol ci marskaja chvaroba, pavodle Jany, jašče nie aznačajuć balničny: u takim vypadku mohuć dać tabletku i adpravić na źmienu.
«Kali niešta surjoznaje, naprykład apiendycyt, vas špitalizujuć u najbližejšym porcie. Tamu što na łajniery niama apieracyjnaj, niama stamatołaha, hiniekołaha, renthiena. Kampanija pakryje vydatki na vaša lačeńnie. Kali ŭ vas niejkaja chvaroba, jakaja patrabuje doŭhaha lačeńnia, ci vy zaciažarali, vas adpraviać dadomu.
Ale nie chvalujciesia, vas nie zaniasuć u čorny śpis, i potym, kali zachočacie, zmožacie viarnucca. Kali ŭ vas kavid ci dyjareja, vas izalujuć na piać dzion. A kali niešta ekstranaje zdarajecca pasiarod akijana i niama času čakać, prylataje viertalot», — tłumačyć jana.
Što tyčycca suviazi sa śvietam, to, pavodle Jany, ciapier na bolšaści łajnieraŭ pracuje Starlink. Dla piersanału miesiendžary čaściej za ŭsio biaspłatnyja, ale za paŭnavartasny internet sa stryminham treba płacić. Tamu mnohija supracoŭniki kuplajuć miascovyja sim-karty ŭ partach albo karystajucca internetam u partovych terminałach.
Jak uładkavacca na łajnier
Dla značnaj častki vakansij śpiecyjalnaja vyšejšaja adukacyja nie patrabujecca. Kali havorka idzie pra restaran, bar, spa, chaŭskipinh (prybirańnie) i padobnyja pazicyi, asnoŭnymi faktarami Jana nazyvaje dośvied pracy i anhlijskuju movu.
Biez dośviedu na niekatoryja pazicyi jašče možna trapić, a biez anhlijskaj — praktyčna nie. Čym lepšaja mova i bolšy dośvied, tym vyšejšuju pasadu i bolšy zarobak možna atrymać.
Dla pracy na recepcyi pieravahaj budzie viedańnie dadatkovych jeŭrapiejskich moŭ — naprykład, italjanskaj, francuzskaj, niamieckaj ci ispanskaj. Dla daktaroŭ, inžynieraŭ, aficeraŭ i inšych śpiecyjalizavanych pazicyj prafiesijnaja adukacyja, dypłomy i siertyfikaty abaviazkovyja.
Što tyčycca ŭzrostu, to ŭ bolšaści kampanij minimalny ŭzrost dla pracaŭładkavańnia — 21 hod, chacia na asobnyja pazicyi mohuć uziać i z 18. Adnak heta chutčej vyklučeńnie.
«Jość dźvie pryčyny, čamu mienavita z dvaccaci adnaho. Pieršaja — heta toje, što łajnier zachodzić u roznyja krainy, i ŭ niekatorych ź ich jość uzrostavyja abmiežavańni dla členaŭ ekipaža. Tak što praściej za ŭsio ŭstalavać adziny minimalny ŭzrost. A druhaja pryčyna źviazana z ałkaholem. Naša kampanija, jak i mnohija inšyja, amierykanskaja, a tam ałkahol dazvoleny mienavita z 21 hoda. A na łajniery vielmi šmat ałkaholu: jaho i pradajuć, i siervirujuć — i haściam, i piersanału», — tłumačyć u videa Jana.
A voś vierchniaj uzrostavaj miažy, pavodle dziaŭčyny, zvyčajna niama. Na łajnierach pracujuć i ludzi va ŭzroście 50—60 hadoŭ i starej.
«Inšaje pytańnie — nakolki vam samim budzie kamfortna. Usio ž taki mnohija pazicyi na łajniery i maralna, i fizična vielmi ciažkija. Voś ja, naprykład, nie viedaju, ci zmahu ja vyciahvać takuju pracu hadoŭ u 50», — pryznajecca jana.
Top-3 samych častych pytańniaŭ ad haściej łajniera
Jana vyłučaje try pytańni, jakija hości zadajuć joj čaściej za ŭsio. Pieršaje — adkul jana.
«Šmat chto z haściej nie viedaje, dzie znachodzicca Biełaruś. Tamu hetaja razmova zaŭsiody doŭžycca chvilin 15».
Druhoje pytańnie — kolki jana ŭžo pracuje na kruizach. Pavodle Jany, paśla troch-čatyroch kantraktaŭ ludzi pierastajuć ličyć adpracavany čas. Praściej adkazać, kolki zastałosia da adpačynku.
Treciaje — ci padabajecca joj pracavać na łajniery i ci atrymlivaje jana ad hetaha zadavalnieńnie.
«Asabliva aktualna niedzie a 6‑j ranicy na apošnim miesiacy kantrakta. Kali ty hałodny, stomleny i niama žadańnia ni z kim razmaŭlać. Ale adkaz zaŭsiody adzin i toj ža: praca mary!» — žartuje Jana.