«Zrazumieła: vykładańnie, vidać, zanadta stresavaje dla mianie». Nastaŭnica z Biełarusi vyrašyła źmianić žyćcio i stała ściuardesaj

«I tut ja padumała: čamu b nie pajechać u Dubaj»

Vieści Threads Viktoryja pačała niadaŭna. Tut jana raskazvaje pra siabie i svaju pracu bortpravadnicy. Piša na staroncy vyklučna pa-biełarusku.

— Vielmi chočacca dadać bolš biełaruskaj movy ŭ paŭsiadzionnaje žyćcio i zrabić tak, kab jana hučała čaściej, — pryznajecca dziaŭčyna ŭ pieršym dopisie i abiacaje padpisčykam raskazvać pra svajo žyćcio ŭ Dubai, pracu i kamandziroŭki.

U adroźnieńnie ad hetaj sacsietki ŭ jaje akaŭncie ŭ Instagram bolš dopisaŭ pra dadubajski pieryjad žyćcia. Tut paznačana, što dziaŭčyna rodam z Baranavičaŭ i ŭ 2025‑m skončyła Biełaruski dziaržaŭny ŭniviersitet zamiežnych movaŭ. U Threads jana pryznajecca, što vučyłasia na linhvista i vykładčycu anhlijskaj movy. Paralelna asvojvała jašče i hišpanskuju, ale jaje, žartuje, praktyčna nie viedaje, tamu pra hety svoj skił amal nidzie nie raskazvaje.

— Padčas praktyki paŭhoda pracavała ŭ škole i davoli chutka zrazumieła: vykładańnie, vidać, zanadta stresavaje dla mianie. Tady vyrašyła, što varta pasprabavać niešta zusim inšaje. I tut ja padumała, čamu b nie pajechać u Dubaj, — piša aŭtarka akaŭnta i tłumačyć svajo rašeńnie. — Heta i mižnarodny dośvied, i vydatnaja mahčymaść palepšyć svaju anhlijskuju. Na toj momant mnie heta padavałasia adnym z samych prostych varyjantaŭ.

Vučyłasia dziaŭčyna płatna, adpracoŭki ŭ jaje nie było, tamu čakać dva hady, kab ideja pieratvaryłasia ŭ realnaść, nie pryjšłosia. Plusam akazałasia i toje, što biełarusam u AAE nie patrebnaja viza. Da taho ž, praciahvaje ŭ paście aŭtarka, u Dubai šmat ruskamoŭnych turystaŭ, tamu tut davoli časta nieabchodnyja supracoŭniki, jakija viedajuć ruskuju. Vierahodna, pryniaŭšy da ŭvahi ŭsie hetyja faktary, Viktoryja znajšła ŭ našaj krainie kampaniju, jakaja dapamahaje z pracaŭładkavańniem u AAE. Jany prapanavali joj niekalki varyjantaŭ — i ŭ vieraśni 2025 hoda dziaŭčyna pierajechała ŭ inšuju krainu.

— U Dubai vielizarnaja kolkaść ludziej z usiaho śvietu, tamu asnoŭnaja mova znosin tut anhlijskaja. Navat miascovyja žychary vielmi časta na joj razmaŭlajuć, — dzielicca biełaruska nazirańniami ŭ Threads. — Arabskuju, viadoma, taksama možna pačuć, ale ŭ paŭsiadzionnym žyćci ja sutykałasia ź joj značna radziej, čym čakała.

«Samaje cikavaje, što zaprašeńnie na intervju mnie pryjšło ŭžo na nastupny dzień»

Pavialičyć

U akaŭncie Viktoryja raskazvaje, što adna z vakansij, jakuju joj prapanavała biełaruskaja kampanija, była ŭ hateli. Jaje dziaŭčyna i vybrała. Kantrakt ź joj padpisali na dva hady, ale «faktyčna» tut jana prapracavała šeść miesiacaŭ.

— Prykładna ŭ toj momant, kali hety termin padyšoŭ da kanca, u rehijonie pačałasia napružanaja situacyja, źviazanaja z atakami dronaŭ, — piša aŭtarka pra padziei vajennaha kanfliktu ŭ rajonie Piersidskaha zaliva, jaki zakranuŭ i AAE. — Dla biźniesu heta aznačała dadatkovyja vydatki i składanaści, tamu kampanija ŭžo nie mahła ŭtrymlivać stolki supracoŭnikaŭ.

Jašče da taho, jak zvolnicca z hatela, biełaruska atrymała zaprašeńnie dałučycca da kamandy Emirates. Dzień, kali dasłała im reziume, u błohu jana nazyvaje «asabliva ciažki» ŭ pracy. Viarnuŭšysia da domu sa źmieny, jana skazała sabie: «Prosta zaraz siadu i padam zajaŭku». Adkryła sajt, zapoŭniła ŭsio nieabchodnaje i adpraviła.

— Śmiešna, ale stać bortpravadnicaj nikoli nie było majoj maraj, — žartuje ŭ Threads dziaŭčyna. — Ale mnie zdajecca, heta adna z samych papularnych prafiesij u Dubai. Kali siudy pryjazdžaješ, ty pastajanna čuješ pra Emirates. U avijakampanii vielmi paznavalnaja forma, dobry imidž, a supracoŭnikam dajuć žyllo. I ŭ niejki momant ja prosta padumała, čamu b nie pasprabavać.

Viktoryja piša, što dla padačy zajaŭki patrebny jak minimum hod dośviedu pracy ŭ śfiery absłuhoŭvańnia. Pryčym nie važna, ci ŭ avijacyi. Plus možna dadać Cover letter, ci, praściej, matyvacyjny list. U im paznačyć, čamu chočaš pracavać mienavita ŭ Emirates.

— Jon byŭ nieabaviazkovy, ale ja vyrašyła napisać, — raskazvaje ŭ paście dziaŭčyna i pryznajecca, što ŭ ese pačała nachvalvać kampaniju. — Napisała, što, kali baču bortpravadnikoŭ Emirates, adčuvaju honar za ich. Što mnie chaciełasia b stać častkaj hetaj kamandy i pradstaŭlać kampaniju i Dubaj.

Biełaruska ŭdakładniaje: važna, kab najmalniki ŭbačyli, što kandydat zacikaŭleny vakansijaj, hatovy pracavać ź ludźmi i raźvivacca ŭnutry kampanii. A nie padumali: čałaviek prosta maryć «biaspłatna vandravać pa śviecie».

— I samaje cikavaje, zaprašeńnie na intervju mnie pryjšło ŭžo na nastupny dzień. Paźniej ja daviedałasia, što ŭ toj ža dzień na sumoŭje paklikali jašče 59 kandydataŭ <…>, — pryznajecca ŭ Threads jana. — Zaraz u kampanii pracuje kala 24 tysiač bortpravadnikoŭ (pa danych na kastryčnik 2025-ha, kala 25 tysiač. — Zaŭ. Red.) prykładna sa 140 krain śvietu. Ale jość adzin važny momant: Emirates bazujecca mienavita ŭ Dubai, tamu, kali ty płanuješ być tut bortpravadnicaj, treba być hatovaj pierajechać u Dubaj.

«Jany krychu ździvilisia, ale sapraŭdy pieratelefanavali!»

Vialiki post u błohu Viktoryja napisała pra Assessment Day, albo dzień adboru kandydataŭ na pasadu bortpravadnika. Pa słovach dziaŭčyny, kali joj patelefanavali z Emirates, prapanavali dźvie daty dla intervju. Adna ź ich supała ź jaje vychodnym. Biełaruska vyrašyła, što «heta vielmi dobry znak», i paprasiła zapisać jaje na hety dzień.

— Da intervju hladzieła ŭ TikTok, jak inšyja dziaŭčaty prachodzili kastynh, čytała ich parady i mahčymyja pytańni, — raskazvaje ŭ Threads aŭtarka błoha. — Mnohija kazali, što za kandydatami pačynajuć nazirać jašče da samoha intervju, navat pakul vy prosta siadzicie ŭ kalidory i čakajecie. Hladziać, jak vy razmaŭlajecie adno z adnym, znajomiciesia, uzajemadziejničajecie. Heta važna, tamu što na kožnym rejsie ŭ ciabie novaja kamanda i kožny raz davodzicca pracavać ź ludźmi, jakich ty raniej nikoli nie bačyŭ <…>.

Razam ź dziaŭčynaj na pasadu bortpravadnika ŭ toj dzień pretendavała jašče 59 čałaviek. Usim im vydali numary, jakija treba było prymacavać da adzieńnia. Z hetaha momantu, žartuje, jana pierastała być Viktoryjaj, a pieratvaryłasia ŭ «prosta numar 53».

«Vyprabavańnie» prachodziła ŭ čatyry etapy. Usio adbyvałasia ŭ adzin dzień. Pa časie heta raściahnułasia prykładna ź dzieviaci ranicy da čatyroch-piaci dnia ź nievialikimi pierapynkami.

— Na pieršym etapie my vychodzili na nievialikuju scenu pa dziesiać čałaviek. Treba było nazvacca, skazać, kolki tabie hadoŭ, adkul ty, vielmi koratka raskazać pra svoj dośvied pracy i adkazać na adno pytańnie, — padrabiazna pieraličvaje ŭ paście dziaŭčyna. — U moj dzień paprasili nazvać adnu reč, jakuju vy b brali z saboj u kožnuju kamandziroŭku. Nas zahadzia papiaredzili nie adkazvać «telefon» abo «pamada» — zanadta banalna, tamu ja skazała, što ŭziała b paštoŭku, jakuju mnie padpisali siabry pierad maim adjezdam ź Biełarusi.

Aŭtarka błoha miarkuje, što jaje adkaz kamisii spadabaŭsia. Vidać, heta troški ŭźniało nastroj i dało bolš siłaŭ na nastupnyja «ispyty» — kamandnaje vyprabavańnie, test pa anhlijskaj i indyvidualnaje intervju. Cikava, što paśla kožnaha etapu kandydaty vychodzili ŭ kalidor, potym ich znoŭ klikali ŭ aŭdytoryju i pakazvali na ekranie numary tych, chto prajšoŭ dalej. Paśla pieršaha turu adsiejałasia pryblizna pałova achvotnych.

— Padčas kamandnaha vyprabavańnia nas dzialili na hrupy prykładna pa siem čałaviek i davali zadaču, jakuju treba było vyrašyć razam. Tut važna było mienavita pracavać u kamandzie, — apisvaje ŭ svaim błohu situacyju dziaŭčyna. — Zaŭvažyła, što ludzi, jakija zanadta mocna sprabavali ŭziać na siabie rolu lidara i kantralavać usio abmierkavańnie, časta nie prachodzili dalej. Im (razmova pra kamisiju. — Zaŭ. Red.), zdajecca, značna važniej ubačyć čałavieka, jaki ŭmieje słuchać inšych, prapanoŭvać idei i pracavać razam z usimi.

Test pa anhlijskaj byŭ «čymści padobny» na CT, tolki prachodziŭ na telefonie. A padčas indyvidualnaha intervju ludziam zadavali pytańni, kab pravieryć, nakolki praŭdziva ŭsio, što napisana ŭ reziumie. U vyniku z 60 čałaviek da finału dajšło ŭsiaho čaćviora. Biełaruska była siarod ich.

Darečy, jak raskazvaje na svajoj staroncy Viktoryja, vyhlad padčas adboru taksama ŭličvali. Skura kandydatki, naprykład, pavinna być zdarovaj, biez mocnych vysypańniaŭ. Vałasy — adnaho koleru, toje ž ambre nie dazvalajecca. Kali karotkaja stryžka, jana nie pavinna dakranacca da kaŭniara, a hryŭka nie moža zakryvać brovy. Nielha mieć tatuiroŭki na bačnych miescach. U kamientarach pad adnym z pastoŭ niechta spytaŭsia, jaki bortpravadnicy treba mieć rost. Biełaruska adkazała, što minimalny — 160 santymietraŭ, a ŭ jaje — 174. Patrebna heta dla taho, kab supracoŭnik moh zakryć bahažnyja palicy.

— Paśla hetaha (usich vyprabavańniaŭ. — Zaŭv. Red.) treba było čakać tak zvany Golden call, «załaty zvanok». Jon moža pryjści na nastupny dzień, praź miesiac ci navat praź niekalki miesiacaŭ. Mienavita padčas hetaha zvanka paviedamlajuć, što ty prajšoŭ adbor, — piša ŭ Threads Viktoryja. — My nie viedali, ci voźmuć usich čaćviarych abo tolki kahości, tamu na ŭsialaki vypadak stvaryli čat u WhatsApp i vyrašyli być na suviazi. Admova, darečy, prychodzić na elektronnuju poštu.

Nakolki intensiŭna praviarała Viktoryja ŭ tyja dni svoj email, jana nie napisała. Ale patrebnaha zvanka dačakałasia. Zdaryłasia heta praz dva tydni. Dziaŭčyna ŭ toj momant znachodziłasia na pracy ŭ hateli. Jana nie adrazu zrazumieła, chto nabiraje, dumała, dastaŭka, i paprasiła pieratelefanavać. Tym bolš vakoł było šumna.

— Jany krychu ździvilisia, ale sapraŭdy pieratelefanavali! — praciahvaje ŭ paście biełaruska. — Što heta Emirates, ja pačała razumieć jašče kali pahladzieła na numar, jon byŭ pryhožy i ŭvohule nie vyhladaŭ jak zvyčajny. Pieratelefanavać samastojna, darečy, było nielha.

«Mahu vas zapeŭnić, što ŭ avijacyi sapraŭdy ŭsio vielmi dobra pradumana i biaśpiečna!»

Pavialičyć

U błohu biełaruska piša, što pierad tym jak pačać lotać, kožnaja bortpravadnica ŭ Emirates, navat kali jana ŭžo maje adpaviedny dośvied, pavinna advučycca ŭ avijacyjnym kaledžy avijakampanii. Padrychtoŭka doŭžycca kala siami tydniaŭ i składajecca ź niekalkich častak. Pieršaja — SEP, to bok biaśpieka i dziejańni ŭ avaryjnych situacyjach.

— My vučymsia, što rabić padčas mocnaj turbulentnaści, dekampresii i inšych nadzvyčajnych situacyj. Paśla hetaha kursa ja mahu vas zapeŭnić, što ŭ avijacyi sapraŭdy ŭsio vielmi dobra pradumana i biaśpiečna! — adznačaje ŭ Threads dziaŭčyna. — U kaledžy jość śpiecyjalnyja simulatary. Kali znachodzišsia ŭnutry, usio heta adčuvajecca amal jak u sapraŭdnym samalocie. Nam tłumačać, jak dziejničać u takich situacyjach, jak pravodzić evakuacyju i dapamahać pasažyram. I pa ŭsim hetym my zdajom ekzamieny.

Vučyli budučych ściuardes avaryjnaj pasadcy na vadu i miedycynie. Tłumačyli, jak rabić niepramy masaž serca i navat, jak prymać rody. Ale, padajecca, bolš za ŭsio biełarusku ŭraziŭ karotki kurs pra toje, jak być z ahresiŭnymi pasažyrami na borcie.

— Palicejskich u niebie niama, tamu taki epizod maje miesca ŭ našaj bazavaj padrychtoŭcy, — tłumačyć u Threads jana. — Pryčym fizičnaja siła tut nie hałoŭnaje. Nas vučyli, jak uziać čałavieka na chitraść, supakoić i pry hetym nie paciarpieć samim <…>.

Dziaŭčyna piša, što ŭ kancy lipienia byŭ jaje pieršy pracoŭny rejs. Latała ŭ Pakistan. Miarkujučy pa pastach, u zachapleńni jana była i ad kamandy, i ad pasažyraŭ.

— Oj, jak ža ja chvalavałasia! Ale, jak akazałasia, zusim darma. Usie viedali, što heta moj pieršy palot, tamu dapamahali, adkazvali na ŭsie pytańni i navat zrabili foty! — nie chavaje ŭ błohu emocyj biełaruska. — Adčuvała siabie małodšaj siastroj. Uvieś čas pytalisia, jak ja siabie adčuvaju i ci niama ŭ mianie pytańniaŭ <…>.

Novaja praca pryniesła nie tolki novyja ŭražańni, ale i bonusy. Siarod ich, jak paznačaje aŭtarka pastoŭ, biaspłatnaje žyllo ŭ Dubai.

— Zvyčajna ŭ kvatery žyvuć dva-try čałavieki, ale ŭ kožnaha jość svoj asobny pakoj i sanvuzieł. Taksama kampanija apłačvaje pieralot u Dubaj pry pierajeździe na pracu i arhanizoŭvaje tranśfier z aeraporta, — pieraličvaje ŭ Threads dziaŭčyna. — Jość źnižki na avijabilety, nie tolki dla vas, ale i dla vašych blizkich, na hateli, kaviarni i restarany, a ŭ niekatoryja spartzały i basiejny možna chadzić navat biaspłatna.

Jašče siarod bonusaŭ, jakija zhadvaje Viktoryja, miedycynskaja strachoŭka i ŭłasnaja klinika dla supracoŭnikaŭ. Darečy, piša biełaruska, usie hetyja pieravahi ludzi pačynajuć atrymlivać jašče padčas navučańnia.

— Samo navučańnie taksama apłočvaje kampanija, ale paźniej jaho košt vyličvajecca z zarpłaty, — paznačaje ŭ paście biełaruska. — A paśla jaho pačynajecca samaje cikavaje — mahčymaść šmat padarožničać i pracavać u mižnarodnaj kamandzie ź ludźmi z usiaho śvietu. Plus jość mahčymaść karjernaha rostu ŭnutry kampanii.

«Voś tak chutka nieba stanovicca zvyčajnaj častkaj žyćcia»

Pavialičyć

Viktoryja piša, što ŭ siarednim u bortpravadnikoŭ kala 90 lotnych hadzin u miesiac. Samy karotki rejs biełaruski doŭžyŭsia pryblizna čatyry hadziny i byŭ u Indyju. A samy doŭhi — 14 hadzin, i prylacieli jany ŭ Aŭstraliju.

— Na kožnym rejsie novy ekipaž, tamu tut kožny pracoŭny dzień znajomišsia z kimści. Usie majuć rozny dośvied, roznyja charaktary, roznyja krainy, ale ŭsie zacikaŭlenyja ŭ tym, kab rejs prajšoŭ dobra <…>, — raskazvaje na svajoj staroncy dziaŭčyna.

U błohu jana taksama adznačaje, što amal uvieś rejs ściuardesy pravodziać na nahach. Tamu jość ryzyka aciokaŭ i varykozu. Z taho, što dapamahaje na doŭhich rejsach — kampresijnyja kałhotki. A jašče paśla prylotu možna na 15−20 chvilin padniać nohi vyšej za ŭzrovień serca i, naprykład, palažać kala ściany. Miarkujučy pa paście, źmiena časavych pajasoŭ dajecca dziaŭčynie kudy składaniej.

— Časam paśla rejsa mahu praspać 18 hadzin prosta tamu, što arhanizm uvohule nie zrazumieŭ, dzie my i kolki ciapier hadzin, — žartuje ŭ akaŭncie jana.

Ź ciepłynioj raskazvaje Viktoryja ŭ Threads i historyi, źviazanyja ź niekatorymi pasažyrami. Niejak jany z kalehami zaŭvažyli ŭ aeraporcie mužčynu, jaki niešta malavaŭ u albomie. A potym hety ž čałaviek apynuŭsia ŭ ich na borcie.

— Adna sa ściuardes, jakaja sama zachaplajecca malavańniem, zahavaryła ź im, pakazała svaje raboty. A ŭ kancy rejsa jon padaryŭ joj nievierahodna pryhožy [jaje] partret, jaki paśpieŭ namalavać za hetyja niekalki hadzin <…>, — apisvaje miłuju situacyju dziaŭčyna i pierachodzić da nastupnaj. — U inšy dzień, pasažyr doŭha raskazvaŭ sumnuju, emacyjnuju historyju pra svajaka, a potym zusim surjozna spytaŭ, ci nielha pierasadzić ich u biźnies-kłas. Nie pierasadzili, viadoma, ale sproba była dobraja.

Źviartaje ŭvahu biełaruska i na zusim «niaśmiešnuju» situacyju z pasažyrami.

— Kali pačynajecca turbulentnaść abo samalot jašče nie spyniŭsia, a niechta ŭžo sprabuje ŭstać ci dastać rečy, stanovicca zusim nie da žartaŭ. U takija momanty razumieješ, što za zvykłym dla pasažyraŭ «prosta pieralotam» dla ekipaža zaŭsiody staić u pieršuju čarhu biaśpieka, — padkreślivaje ŭ błohu jana. — Strašna ŭjavić, što moža adbycca pry niapravilnym vykarystańni bahažnaj palicy. Tamu nie kryŭdujcie na nas za zaŭvahi. Heta ŭ pieršuju čarhu dla vašaj ža biaśpieki.

Pa dušeŭnaści, ź jakoj biełaruska viadzie svoj błoh, možna mierkavać, što niezvyčajnaja praca joj padabajecca. U Threads jana pryznajecca, što jak novy čałaviek u avijacyi, jana časam źviartajecca da bolš vopytnych kaleh z pytańniami, — i tyja zaŭsiody dapamahajuć.

— Voś tak chutka nieba stanovicca zvyčajnaj častkaj žyćcia, — emacyjna zaznačaje ŭ Threads Viktoryja i paetyčna dadaje, što, zdajecca, nie tak daŭno latać mahli tolki ptuški. — A ciapier niekalki razoŭ na tydzień ja sama akazvajusia na vielizarnaj vyšyni nad ziamloj. I štoraz padčas pasadki ŭsio roŭna ŭźnikaje dumka: «Jak uvohule čałaviectva dadumałasia da taho, što vielizarnaja mašyna moža prosta ŭziać i palacieć?» I štoraz heta zachaplaje.

• 10
• 1
• 0
• 1
• 0
• 0
• 0
• 1