Padčas hulni Sabalenka na US Open na korcie mocna patychała marychuanaj

Biełaruska tenisistka Aryna Sabalenka vyjšła ŭ 1/8 finału US Open 2026, nie addaŭšy supiernicam nivodnaha seta. Adnak padčas matču treciaha kruha suprać Kamiły Rachimavaj z Uźbiekistana pieršaja rakietka śvietu sutyknułasia ź niečakanaj prablemaj — z trybun danosiŭsia mocny pach marychuany.

Aryna Sabalenka. Fota: AP Photo/Adam Hunger

Užo ŭ trecim hiejmie pieršaha seta Sabalenka na imhnieńnie spyniła hulniu, azirnułasia na trybuny i źviarnułasia da svajoj kamandy. Paśla hetaha jana padyšła da sudździ Evy Asderaki-Mur i paprasiła razabracca z zaŭziataram, jaki, pavodle jaje słoŭ, kuryŭ marychuanu.

Sudździa adrazu dała sihnał supracoŭnikam korta, i pradstaŭniki słužby biaśpieki nakiravalisia na trybunu, kab znajści krynicu pachu.

Padobnyja vypadki na US Open adbyvajucca ŭžo nie ŭpieršyniu. Tenisny kompleks USTA Billie Jean King National Tennis Center znachodzicca pobač z Flushing Meadows Corona Park, dzie ŭžyvańnie marychuany dazvolena. Na terytoryi samoha turniru kureńnie zabaroniena, adnak dym časam traplaje i na stadyjony.

Arhanizatary zajavili, što nie mohuć kantralavać toje, što adbyvajecca za miežami tenisnaha centra, ale sočać za vykanańniem zabarony na kureńnie na terytoryi kompleksu. Pry vyjaŭleńni parušeńniaŭ supracoŭniki robiać zaŭvahi zaŭziataram.

Niahledziačy na ​​niepryjemny incydent, Sabalenka zmahła praciahnuć matč i ŭpeŭniena pieramahła Rachimavu — 6:3, 6:4, vyjšaŭšy ŭ čaćviorty kruh turniru.

Prablema z pacham marychuany na US Open viadomaja daŭno. Letaś na jaje publična skardziŭsia narviežac Kaśpier Ruud, a ŭ 2023‑m niemiec Alaksandr Źvieraŭ taksama kazaŭ pra mocny pach na terytoryi Flushing Meadows.

Kamientary da artykuła