U Hiermanii — dźvie novyja sproby dyviersij na elektrapadstancyjach

U Hiermanii zafiksavali jašče dźvie sproby dyviersij na abjektach enierhietyčnaj infrastruktury. U Saksonii kala padstancyj Hraŭštajn i Biervalde znajšli 11 samarobnych vybuchovych i zapalnych pryład: čatyry kala pieršaj padstancyi i siem kala druhoj, piša Bild.

Fota: Bild

Paśla znachodki palicyja abśledavała vysakavoltnyja linii, kab pravieryć, ci niama pablizu inšych niebiaśpiečnych pradmietaŭ. Pravaachoŭniki paćvierdzili praviadzieńnie apieracyi, ale nie stali raskryvać jaje padrabiaznaści.

Hetyja vypadki adbylisia na fonie sieryi inšych incydentaŭ na enierhietyčnych abjektach Hiermanii. 4 vieraśnia padazronyja pradmiety z tajmierami znajšli kala vysakavoltnych linij u Darmahienie, a palicyja pravodziła pravierku na padstancyi ŭ Handerkieze.

Raniej, 1 vieraśnia, była ataka na padstancyju Prejłak kala elektrastancyi Jenšvalde ŭ Brandenburhu. Taksama adbyŭsia incydent kala Bierchajma pad Kiolnam, u vyniku jakoha karotkaje zamykańnie pryviało da adklučeńnia niekalkich enierhabłokaŭ ahulnaj mahutnaściu kala 4200 MVt. 2 vieraśnia vybuchovyja pryłady znajšli kala jašče adnoj padstancyi ŭ Brandenburhu.

Niamieckija ŭłady rasśledujuć sieryju hetych vypadkaŭ taksama na fonie abvinavačańniaŭ Rasii ŭ arhanizacyi dyviersii ŭ aeraporcie Lejpcyh/Hale. Pa słovach niamieckaha ministra ŭnutranych spraŭ Alaksandra Dobrynta, vykanaŭcy toj ataki dziejničali na zamovu rasijskich dziaržaŭnych struktur.

Kamientary da artykuła