Uitkafa i Kušniera ŭ Maskvie supravadžaŭ adkazny za sankcyi čynoŭnik Minfina ZŠA
Džyn Łenh udzielničaŭ u padrychtoŭčaj sustrečy z pradstaŭnikom Pucina Kiryłam Dźmitryjevym, ale nie prysutničaŭ na pieramovach z samim rasijskim kiraŭnikom. Axios miarkuje, što ŭ Maskvie abmiarkoŭvali amierykanskija sankcyi.
Vykonvajučy abaviazki kiraŭnika sankcyjnaha napramku Ministerstva finansaŭ ZŠA Džyn Łenh dałučyŭsia da śpiecpasłańnikaŭ Donalda Trampa Styva Uitkafa i Džareda Kušniera padčas ich vizitu ŭ Maskvu, paviedamlaje Axios.
Łenh udzielničaŭ u padrychtoŭčaj sustrečy z kiraŭnikom Rasijskaha fondu pramych inviestycyj i śpiecpradstaŭnikom Pucina Kiryłam Dźmitryjevym. Na trochhadzinnaj sustrečy Uitkafa i Kušniera z Pucinym jaho nie było.
Na dumku Axios, prysutnaść čynoŭnika, adkaznaha za sankcyjnuju palityku, śviedčyć, što amierykanskija abmiežavańni suprać Rasii byli adnoj z tem pieramoŭ.
Pradstaŭnik Biełaha doma paćvierdziŭ vydańniu, što ŭ sustrečach u Maskvie ŭdzielničali supracoŭniki Rady nacyjanalnaj biaśpieki, Dziarždepartamienta i Ministerstva finansaŭ.
«Baki abmierkavali kankretnyja płany dalejšych dziejańniaŭ, pra jakija budzie abvieščana ŭ najbližejšyja tydni, i raźličvajuć na takija ž praduktyŭnyja sustrečy zaŭtra va Ukrainie», — zajaviŭ jon.
Na minułym tydni ministr finansaŭ ZŠA Skot Biesent kazaŭ, što Vašynhton nie budzie źmiakčać ekanamičnyja abmiežavańni suprać Rasii, pakul taja nie spynić vajnu va Ukrainie.
U niadzielu Uitkafa i Kušniera čakajuć u Kijevie.