Na byłych mohiłkach kala kaścioła śviatoha Rocha ŭ Minsku stali ŭzvodzić jašče adzin budynak

Pobač z kaściołam Śviatoha Rocha na Załatoj Horcy ŭ Minsku ŭzvodziać jašče adzin budynak. Heta vidać na śviežych fota, jakija vydańnie Katolik.life zaŭvažyła ŭ sacsietcy. Hety ŭčastak — byłyja katalickija mohiłki. Jon byŭ zamacavany za katalickaj parafijaj, vierniki stvaryli tut skvier.

Paśla hetuju terytoryju ŭ katalikoŭ raptoŭna zabrali i pačali tut u 2025 hodzie maštabnuju budoŭlu. Kali budynak byŭ užo amal uźviedzieny, pobač pačałosia budaŭnictva jašče adnaho abjekta — taksama sakretnaha.

Nijakich adkrytych źviestak pra jaho ŭ volnym dostupie niama. U aficyjnaj dakumientacyi budaŭnictva paznačanaje jak «Uźviadzieńnie budynka šmatfunkcyjanalnaha pa vuł. Załataja Horka, 5 i 5a, u h. Minsku. 2‑ia čarha budaŭnictva». Pieršyja źviestki pra jaho źjavilisia na servisach dziaržzakupak u žniŭni 2026 hoda.

Placoŭka dla novaha budynka na terytoryi skviera była rasčyščanaja ŭ toj ža čas, kali vykapali katłavan pad pieršy budynak i padniali pareštki pachavanych na mohiłkach.

Kali pra heta stała viadoma, vierniki prasili, kab pareštki pieradali supolnaści dla pierapachavańnia, a ŭ štotydniovych parafijalnych abjavach doŭha značyŭsia malitoŭny zaklik: «Kab pareštki našych prodkaŭ, pachavanych na Załatahorskich mohiłkach, nie byli źniščanyja».

Ale dahetul parafijanam nie paviedamlali, ci byli pieradadzienyja pareštki — nijakaj infarmacyi pra pierapachavańnie viernikam nie padavali. A malitoŭny zaklik u apošnija miesiacy bolš nie hučyć u parafijalnych abjavach.

Na publičnaj kadastravaj mapie Biełarusi terytoryja, na jakoj viadziecca budaŭnictva, nijak nie paznačanaja. Jość tolki adzin plac, adviedzieny pad uźviadzieńnie «budynka šmatfunkcyjanalnaha», ale jaho płošča składaje tolki 0,007 ha.

Pavodle nieaficyjnych źviestak, pryznačeńnie hetaha abjekta — ustanova adukacyi KDB, novy korpus Akademii nacyjanalnaj biaśpieki.

Kamientary da artykuła