Z kastryčnika ŭ minskim raddomie №2 pierastajuć rabić EKA — navat za hrošy. Ale, jak zaŭsiody, zrabić heta chočuć cichieńka
Žančyny ŭ šoku, bo niechta ź ich čakaje pieranosu embryjona. Ciapier ža niezrazumieła, chto budzie apłačvać transpartavańnie bijamateryjału ŭ inšyja miescy.
Fota: gor-roddom2.by
Sioleta ŭ červieni Saviet ministraŭ pastanovaj №313 skaraciŭ śpis arhanizacyj, dzie možna zrabić EKA za košt dziaržavy.
Raniej biaspłatnyja sproby pravodzili na bazie Homielskaha abłasnoha dyjahnastyčnaha miedycynska-hienietyčnaha centra z kansultacyjaj «Šlub i siamja», haradskoha kliničnaha radzilnaha doma №2 Minska, a taksama Respublikanskaha navukova-praktyčnaha centra «Maci i dzicia». U vyniku mahčymaść zrabić EKA za košt dziaržavy pakinuli tolki dla apošniaha.
U staličnaj radzilni №2 była dobraja reputacyja — tam pracujuć kvalifikavanyja śpiecyjalisty, možna zrabić PHT (hienietyčnaje daśledavańnie embryjona pierad pieranosam u matku). Tamu šmat chto byŭ hatovy prychodzić siudy na EKA za ŭłasnyja srodki.
Ale niadaŭna žančyn, siarod jakich chapaje tych, chto ŭžo rychtujecca da pieranosaŭ embryjonaŭ, šakavali navinoj: z 1 kastryčnika haradski kliničny radzilny dom №2 Minska pierastanie akazvać pasłuhi EKA naohuł.
Aficyjnaj infarmacyi niama — pra ŭsie źmieny biełaruski daviedvajucca niepasredna na pryjomie ŭ daktaroŭ. Pryčym miedyki sami nie viedajuć, što budzie dalej — kažuć, taksama atrymlivajuć usiu infarmacyju vusna, dakumientaŭ nie bačyli. Ale ad ich patrabujuć zakryć u vieraśni ŭsie mahčymyja pratakoły i nie brać novych.
Zapisu novych pacyjentak na kastryčnik sapraŭdy nie viadziecca.
Pa nieaficyjnych danych, abstalavańnie ŭ chutkim časie pieraviazuć u «Maci i dzicia».
U žančyn ža pytańniaŭ vielmi šmat — adno z hałoŭnych tyčycca taho, kudy pieraviazuć tyja embryjony, jajcakletki, śpiermatazoidy, jakija zachoŭvajucca ŭ radzilnym domie №2, i chto pavinien budzie apłacić toje transpartavańnie.
Pakul što, pa infarmacyi miedykaŭ, płanujecca zrabić heta za košt pacyjentaŭ.
Z čym źviazana rašeńnie prypynić rabić EKA na płatnaj asnovie ŭ radzilni №2, dakładna nie viadoma — pasłuha karystałasia popytam. Ale siarod miedykaŭ užo daŭno chodziać čutki, što ŭłady płanujuć zakryć i hetuju radzilniu (nahadajem, sioleta cicha začynili radzilniu №3).
Imavierna, admova spačatku ad praviadzieńnia biaspłatnaha EKA, a potym i płatnaha, źviazana z tym, što radzilniu sapraŭdy pačynajuć rychtavać da zakryćcia.
Apošnija hady demahrafičnaja situacyja ŭ Biełarusi paharšajecca — dziaciej naradžajecca ŭsio mienš i mienš. Za 2025 hod u Biełarusi naradziłasia 54 257 dziaciej (pa statystycy Biełstata). Heta čarhovy antyrekord — u 2024‑m naličyli 58 938 dziaciej, što taksama ličyłasia najhoršym pakazčykam z časoŭ vajny.