Siabar Pačobuta: Paśla tydnia ŭ Biełarusi Andrej pajedzie ŭ Amieryku

Žurnalist vydańnia Gazeta Wyborcza i siabar Andreja Pačobuta Bartaš Vialiński padkreśliŭ, što ciapierašni jahony vizit u Biełaruś u pieršuju čarhu maje pryvatny charaktar, paviedamlaje Biełaruskaja słužba Polskaha radyjo.

Andrej Pačobut u Hrodnie. Fota: facebook.com/andrzej.poczobut.9

Pa słovach Bartaša Vialińskaha, Andrej Pačobut zastaniecca ŭ Biełarusi kala tydnia, bo paźniej u jaho zapłanavanyja vizity ŭ ZŠA i Kanadu.

«Jon jedzie tolki na tydzień, u pryvatnaści, naviedać baćku, znajomyja miaściny, kalehaŭ z SPB. Heta pryvatnaje, a nie palityčnaje padarožža. Paźniej u jaho zapłanavanyja vizity ŭ Kanadu i ZŠA, tamu jon padarožničaje z amierykanskaj vizaj u pašparcie», — zajaviŭ Vialiński.

Jon adznačyŭ, što ŭ Andreja Pačobuta byli aściarohi nakont hetaha vizitu, ale jon vyrašyŭ pajechać u Biełaruś, bo jaho zapeŭnili, što zmoža viarnucca.

«Jon jedzie z tryvohaj, ale realistyčna miarkuje, što režymu nie vyhadna ciapier kryŭdzić jaho. Maŭlaŭ, kali b jaho chacieli zabić, to zrabili b heta daŭno. Akramia taho, jamu paabiacali — jaho vyzvalili z turmy, dali pašpart, zahadali pierasiačy miažu i skazali, što administracyja Łukašenki abiacała, što jon moža viarnucca ŭ Biełaruś. U adpaviednaści z hetym, jon viartajecca na niejki čas», — kaža Bartaš Vialiński.

Sam Andrej Pačobut pakul nie kamientuje svajoj pajezdki ŭ Biełaruś. Na jahonaj staroncy ŭ fejsbuku byŭ apublikavany tolki zdymak, padpisany: «Na race Nioman».

Pačobut pryjechaŭ u Biełaruś z Polščy ranicaj 8 vieraśnia. 

Kamientary da artykuła