Košt nafty Brent pieravysiŭ $100 za baral
Rynki zakładvajuć u kaciroŭki vierahodnaść zaciažnoha kanfliktu na Blizkim Uschodzie.
Fota: Getty Images
Košt listapadaŭskaha fjučarsa na naftu Brent na tarhach u sieradu vyras na 2,32% i dasiahnuŭ $100,19 za baral. Papiaredni raz vyšej za adznaku $100 za baral Brent handlavałasia 24 lipienia 2026 hoda.
Ceny na naftu padskočyli da $100 za baral paśla taho, jak iranskija vajskoŭcy zajavili pra ŭdary pa vaśmi amierykanskich tankierach i dvuch inšych amierykanskich sudnach u Piersidskim zalivie.
Akramia taho, vajenna-marskija siły Korpusa vartavych Isłamskaj revalucyi paviedamili pra ŭdary jašče pa dziesiaci karablach, jakija, jak śćviardžajecca, pry padtrymcy amierykanskich vajskoŭcaŭ sprabavali prajści praz Armuzski praliŭ, abvieščany Iranam zakrytym dla sudnaŭ i niebiaśpiečnym dla płavańnia rajonam.
U aŭtorak Saudaŭskaja Aravija zajaviła, što praca niekalkich enierhietyčnych abjektaŭ u krainie była prypynienaja z-za atak. Napady na abjekty ŭ Saudaŭskaj Aravii ŭzmacnili aściarohi, što pastaŭki nafty ź Blizkaha Uschodu nadoŭha zastanucca na nizkim uzroŭni z-za atak chusitaŭ i vajny ŭ Iranie.
Z-za hetaha suśvietnyja zapasy nafty skaračajucca, a ceny na paliva, u tym liku dyzielnaje, imkliva rastuć. Pavodle Bloomberg, u Jeŭropie košt dyzielnaha paliva nabližajecca da $200 za baral.