Francuzski špijonski tryler pra biełaruskuju dyktaturu pryznany «ekstremisckimi materyjałami»
U knizie «Noa» chatniaja haspadynia Śviatłana pieramahaje na prezidenckich vybarach. Śpiecsłužby vyvoziać Śviatłanu ź dziećmi za miažu, a jaje muža adpraŭlajuć u turmu. Mižnarodnaja hrupa chakieraŭ-aktyvistaŭ vyrašaje ŭmiašacca i pačynaje kibierapieracyju suprać režymu dyktatara Łučyny.
Mark Levi, Wikimedia Commons
Kniha francuzskaha piśmieńnika Marka Levi «Noa» pryznanaja «ekstremisckimi materyjałami» ŭ Biełarusi. Adpaviednaje rašeńnie pryniaŭ sud Centralnaha rajona Minska, piša Reform.news.
«Noa» — špijonski tryler, dziejańnie jakoha adbyvajecca ŭ Biełarusi. Padziei ramana razhortvajucca ŭ 2020—2022 hadach.
Viasnoj 2020 hoda chatniaja haspadynia Śviatłana pieramahaje na prezidenckich vybarach paśla 27 hadoŭ praŭleńnia dyktatara Łučyna. Śpiecsłužby vyvoziać Śviatłanu ź dziećmi za miažu, a jaje muža Mikałaja adpraŭlajuć u turmu. U Biełarusi pačynajucca represii. U Minsku hinie žurnalistka, jakaja rasśledavała karupcyju siarod vyšejšaha kiraŭnictva.
Pavodle siužeta ramana, mižnarodnaja hrupa chakieraŭ-aktyvistaŭ («Hrupa 9») vyrašaje ŭmiašacca i pačynaje kibierapieracyju suprać režymu dyktatara Łučyna: chakiery ŭzłomvajuć zakrytyja bazy danych KDB, vyjaŭlajuć tajemnyja afšornyja rachunki kiraŭnictva krainy, pierachoplivajuć kiravańnie dziaržaŭnym telebačańniem, vyvoziać z krainy siemji represavanych aktyvistaŭ i dapamahajuć apazicyjanieram paźbiehnuć aryštaŭ.