Dźmitryj Baskaŭ uznačaliŭ naziralnuju radu chakiejnaha kłuba «Dynama-Minsk»

Chakiejny kłub «Dynama-Minsk» paviedamiŭ pra źmienu kiraŭnika naziralnaj rady. Jaje novym staršynioj staŭ Dźmitryj Baskaŭ, jaki akurat siońnia paviedamiŭ pra zakančeńnie svajoj piacihadovaj dyskvalifikacyi.

Dźmitryj Baskaŭ

Raniej Baskaŭ byŭ hienieralnym dyrektaram «Dynama-Minsk», a paśla ŭznačaliŭ Fiederacyju chakieja Biełarusi. U vieraśni 2021 hoda Dyscyplinarnaja rada Mižnarodnaj fiederacyi chakieja na lodzie (IIHF) adchiliła jaho ad luboj dziejnaści, źviazanaj z chakiejem, na piać hadoŭ. Termin dyskvalifikacyi ciapier skončyŭsia, pra što Baskaŭ uračysta paviedamiŭ u svaim telehram-kanale.

8 vieraśnia 2021 hoda Mižnarodnaja fiederacyja chakieja (IIHF) pryniała rašeńnie nakłaści sankcyi na Dźmitryja Baskava. Jaho abvinavacili ŭ złoŭžyvańni słužbovym stanoviščam, cisku na spartoŭcaŭ i datyčnaści da śmierci 12 lispapada 2020 hoda Ramana Bandarenki, dyskvalifikavaŭšy na piać hadoŭ.

Zhodna z aficyjnym rašeńniem IIHF, dyskvalifikacyja pačałasia 10 vieraśnia 2021 hoda i skončyłasia 9 vieraśnia 2026 hoda. 

Naziralnaja rada źjaŭlajecca vyšejšym orhanam kiravańnia kłubam «Dynama-Minsk». Jaje stvaryli ŭ 2010 hodzie. Rada vyznačaje finansavuju, tranśfiernuju i infarmacyjnuju palityku kamandy, a taksama zajmajecca spartyŭnymi i kadravymi pytańniami.

U abnoŭleny skład naziralnaj rady taksama ŭvajšli namieśnik ministra ŭnutranych spraŭ Hienadź Kazakievič, staršynia BFST «Dynama» Dźmitryj Bałaba, načalnik upraŭleńnia nacyjanalnych kamandaŭ Ministerstva sportu Michaił Prakapienka i hienieralny sakratar Fiederacyi chakieja Biełarusi Andrej Baško.

Kamientary da artykuła