Try ź piaci tankieraŭ, pa jakich pazaŭčora ŭdaryli ZŠA, byli źviazanyja z rasijskim cieniavym fłotam

Try ź piaci naftavych tankieraŭ, pa jakich amierykanskija vajskoŭcy ŭdaryli 8 vieraśnia, majuć niepasrednuju suviaź z rasijskim «cieniavym fłotam». Pra heta paviedamiŭ upaŭnavažany prezidenta Ukrainy pa pytańniach sankcyjnaj palityki Uładzisłaŭ Ułasiuk, piša «Ukrinfarm».

Tankier Kaviz. Fota: vesselfinder.com

Pavodle jaho słoŭ, havorka idzie pra tankiery Kaviz, Charminar i Riesco. Jany pieravozili rasijskuju naftu, zachodzili ŭ rasijskija party i vykarystoŭvalisia dla pracy va ŭmovach sankcyj. Sami ŭdary ZŠA pa piaci iranskich naftavych tankierach byli naniesienyja 8 vieraśnia ŭ adkaz na sproby Irana atakavać amierykanski vajskovy karabiel.

Tankier Kaviz, jak adznačyŭ Ułasiuk, zachodziŭ u rasijskija party Uść-Łuha i Novarasijsk, pieravoziŭ rasijskuju naftu i adklučaŭ sistemu aŭtamatyčnaj identyfikacyi AIS, jakaja dazvalaje adsočvać ruch sudnaŭ. Jon byŭ źviazany z kampanijaj Fractal Marine DMCC, jakuju nazyvajuć adnym z asnoŭnych apierataraŭ rasijskaha «cieniavoha fłotu» ŭ pieršyja hady paśla ŭviadzieńnia sankcyj suprać rasijskaj nafty.

Charminar, pa słovach Ułasiuka, zachodziŭ va Uść-Łuhu, Prymorsk, Vysock i Sankt-Pieciarburh. Paśla taho jak Vialikabrytanija ŭviała sankcyi suprać Fractal Marine, źviazanyja z kampanijaj sudny pačali afarmlać na inšych mieniedžaraŭ, adnak pieravozki rasijskaj nafty praciahnulisia. Akramia taho, Charminar źviazany z sudnachodnaj strukturaj, jakuju kantraluje iranski naftavy mahnat Machamied Chasejn Šamchani. Heta struktura pracuje adnačasova ź iranskaj i rasijskaj naftaj.

Tankier Riesco, jak śćviardžaje Ułasiuk, taksama pieravoziŭ naftu z abiedźviuch krain. U pryvatnaści, rasijskaja i iranskaja nafta mahła pieramiaščacca praź pierahruzki ź inšych sudnaŭ, jakija znachodziacca pad sankcyjami. Pavodle słoŭ ukrainskaha čynoŭnika, hety tankier dobra pakazvaje, jak pierasiakajucca rasijskaja i iranskaja sistemy abychodu sankcyj.

Uładzisłaŭ Ułasiuk padkreśliŭ, što ŭsie try tankiery znachodziacca pad sankcyjami Ukrainy i ZŠA. Kaviz, akramia taho, uklučany ŭ sankcyjnyja śpisy Jeŭrasajuza, Vialikabrytanii, Kanady i Šviejcaryi.

Jon zajaviŭ, što rasijski i iranski «cieniavyja fłoty» źviazanyja pamiž saboj praz sudny, mieniedžaraŭ, pasiarednikaŭ i maršruty pieravozki nafty. Tamu, na jaho dumku, miery suprać takich sudnaŭ pavinny być surovymi niezaležna ad ich farmalnaha ściaha i ŭładalnikaŭ.

Kamientary da artykuła