Pinčuk kupiŭ noŭtbuk, ale karystacca im nie zmoh. Uźnikła niečakanaja prablema
Žychar Pinska nabyŭ praź internet-placoŭku noŭtbuk Apple u pryvatnaj asoby ź Minska. Cana, źniešni vyhlad i charaktarystyki pakupnika zadavolili, a sama technika na momant pakupki była spraŭnaj. Ale pry sprobie joj karystacca ŭźnikła niečakanaja prablema, piša Dziaržaŭny kamitet sudovych ekśpiertyz.
Zdymak ilustracyjny. Fota: magnific.com
Paśla viartańnia dadomu mužčyna abnaviŭ apieracyjnuju sistemu noŭtbuka, paśla čaho vyśvietliłasia, što dostup da pryłady abmiežavany i karystacca joj u zvyčajnym režymie niemahčyma.
Pinčuk pasprabavaŭ viarnuć techniku pradaŭcu, ale toj kateharyčna admoviŭsia pryniać jaje nazad. Tady pakupnik źviarnuŭsia ŭ sud. Kab vyśvietlić pryčyny prablemy i mahčymaść paŭnavartasnaha vykarystańnia noŭtbuka, była pryznačanaja ekśpiertyza radyjoelektronnych pryład i elektrabytavoj techniki.
Ekśpiert Pinskaha mižrajonnaha adździeła Dziaržaŭnaha kamiteta sudovych ekśpiertyz vyjaviŭ, što pryłada padklučanaja da miechanizmu aŭtamatyčnaj rehistracyi pryład Apple. Dla jaje paŭnavartasnaha vykarystańnia nieabchodna prajści abaviazkovuju rehistracyju ŭ śpiecyjalnaj sistemie.
Biez hetaj pracedury niemahčyma zaviaršyć pieršapačatkovyja nałady noŭtbuka i vykarystoŭvać jaho ŭ adpaviednaści z praduhledžanym vytvorcam paradkam. Ekśpiertyza taksama pakazała, što pryłada naležyć arhanizacyi, jakaja vykarystoŭvaje śpiecyjalnyja miechanizmy abarony dostupu da jaje.
Z ulikam zaklučeńnia ekśpierta sud pastanaviŭ skasavać damovu kupli-prodažu. Pry hetym pradaviec pavinien viarnuć pakupniku hrošy nie tolki za noŭtbuk, ale i za praviadzieńnie ekśpiertyzy.