Źbirajucca zajaŭki na stypiendyi dla biełaruskich studentaŭ ad «Niabačnaha ŭniviersiteta dla Biełarusi»

«Niabačny ŭniviersitet dla Biełarusi» (The Invisible University for Belarus, IUBEL) abviaščaje pryjom zajavak na vosieński siemiestr 2026 hoda. Zaprašajuć biełaruskich studentaŭ i niadaŭnich vypusknikoŭ, jakija znachodziacca ŭ krainach ES ci Arhanizacyi ekanamičnaha supracoŭnictva i raźvićcia. Udzieł u prahramie biaspłatny.

Fota: www.ceu.edu

Na konkursnaj asnovie dastupnyja daśledčyja stypiendyi pamieram da 800 jeŭra za siemiestr dla studentaŭ, jakija žadajuć realizavać śpiecyjalny empiryčny ci tearetyčny prajekt u dadatak da asnoŭnaj vučoby ŭ IUBEL. Da zajaŭki nieabchodna dałučyć karotkaje apisańnie prajekta (pamieram 400—800 słoŭ).

Asnoŭnaja mova navučańnia — anhlijskaja. Dla kansultacyj vykarystoŭvajecca biełaruskaja mova.

Što takoje «Niabačny ŭniviersitet dla Biełarusi»

«Niabačny ŭniviersitet dla Biełarusi» (IUBEL) — heta siertyfikacyjnaja prahrama (z kredytami ECTS), zapuščanaja ŭ 2026 hodzie Centralnajeŭrapiejskim univiersitetam dla studentaŭ bakałaŭryjatu (BA) i mahistratury (MA and PhD) ź Biełarusi, jakija žyvuć u ES i inšych krainach. 

IUBEL — heta rehijanalnaje adździaleńnie Hłabalnaha niabačnaha ŭniviersiteta (GIU), adukacyjnaj prahramy, jakaja padtrymlivaje studentaŭ i navukoŭcaŭ, što žyvuć va ŭmovach vajny, aŭtarytaryzmu, palityčnych represij i pieramiaščeńnia.

Prahrama prapanuje biełaruskim studentam intensiŭny vopyt navučańnia pa temach, jakija tyčacca Uschodniaj i Centralnaj Jeŭropy, razhladajučy pytańni, aktualnyja dla biełarusaŭ, u transnacyjanalnaj paraŭnalnaj pierśpiektyvie. Prahrama nie pryznačanaja dla zamieny abo dublavańnia najaŭnych mahčymaściaŭ adukacyi ŭ jeŭrapiejskich univiersitetach, a dla ich padtrymki, zapaŭniajučy prabieły, jakija časova ŭźnikli z-za turbulentnych padziej u rehijonie. Prahrama ładzicca z metaj zabiaśpiečyć biełaruskim studentam dostup da adukacyjnaj infrastruktury i akademičnych viedaŭ, a taksama spryjać uźniknieńniu supolnaści biełaruskich studentaŭ i navukoŭcaŭ, jakija mahli b akazać stanoŭčy ŭpłyŭ na ŭstojlivaść hramadzianskaj supolnaści Biełarusi i budučyniu Biełarusi ŭ cełym.

Chto moža ŭdzielničać u prahramie

Da ŭdziełu zaprašajucca biełarusy, jakija adpaviadajuć nastupnym kryteryjam:

• padtrymka demakratyčnych kaštoŭnaściaŭ i kaštoŭnaściaŭ u halinie pravoŭ čałavieka.
• navučańnie abo niadaŭniaje zakančeńnie prahram bakałaŭryjatu, mahistratury ci aśpirantury (PhD) u krainach ES ci AESR.
• taksama razhladajucca zajaŭki ad biełarusaŭ, čyja vyšejšaja adukacyja była pierapynienaja pa abjektyŭnych pryčynach, pry ŭmovie, što zajaŭnik demanstruje niaźmiennuju cikavaść da akademičnaj dziejnaści.
• zajaŭki ad biełarusaŭ, jakija žyvuć u krainach pa-za miežami ES ci AESR, razhladajucca ŭ indyvidualnym paradku.

Dedłajn dla padačy zajavak

17 vieraśnia 2026 hoda, 23:59 (čas pa Budapiešcie).

Udzielniki kursaŭ atrymajuć apaviaščeńnie pra vyniki da 21 vieraśnia 2026 hoda. Kandydaty, adabranyja na atrymańnie daśledčaj stypiendyi, buduć pra heta painfarmavanyja da 9 kastryčnika 2026 hoda.

Padać zajaŭku možna pa spasyłcy. 

Fota: www.ceu.edu

U jakim farmacie prachodzić navučańnie i što ŭ prahramie

Prahrama raspracavanaja ŭ hibrydnym farmacie (anłajn-navučańnie, dapoŭnienaje zimovaj škołaj na miescy).

Vosieńniu 2026 hoda Niabačny ŭniviersitet dla Biełarusi (IUBEL) prapanuje bazavy miždyscyplinarny kurs pa Biełarusi: «Biełaruś pad pytańniem: pieraasensavańnie palityki, hramadstva i kultury ŭ rehijanalnym i hłabalnym kantekstach». Sukiraŭniki kursa: Taćciana Ščytcova (Jeŭrapiejski humanitarny ŭniviersitet, Vilnia) i Andrej Kazakievič (Instytut palityčnych daśledavańniaŭ «Palityčnaja śfiera»).

Hety kurs abjadnaje miždyscyplinarnuju kamandu viadomych mižnarodnych i biełaruskich navukoŭcaŭ, siarod jakich En Epłbaŭm, Neli Biekus, Devid Marpłs, Almira Usmanava, Iryna Ramanava i inšyja.

Akramia taho, studenty IUBEL mohuć naviedvać dva kursy, prapanavanyja rehijanalnymi adździaleńniami ŭ miežach šyrejšaj inicyjatyvy «Hłabalny niabačny ŭniviersitet» (Global Invisible University — GIU), jakija skancentravany na tematycy Ukrainy, Hruzii i Paŭdniova-Uschodniaj Jeŭropy.

Kožny kurs składajecca z  12‑ci zaniatkaŭ (pa 100 chvilin), što adpaviadaje 4‑m kredytam ECTS. Čakajecca, što studenty abiaruć jak minimum adzin i maksimum try kursy. Dadatkova IUBEL prapanuje niekalki karotkaterminovych transdyscyplinarnych intensiŭnych anłajn-sieminaraŭ. 

Navučańnie prachodzić anłajn na anhlijskaj movie ŭ druhoj pałovie dnia (adzin raz na tydzień pa kožnym kursie). Zaniatki zapisvajucca, tamu zarehistravanyja studenty, jakija nie mohuć prysutničać na anłajn-sustrečach, majuć mahčymaść pahladzieć zapisy paźniej.

Padrabiaźniej pra prahramu navučańnia čytajcie pa spasyłcy.

Kamientary da artykuła