Iran pierad udaram pa amierykanskaj bazie ŭ Iardanii atrymaŭ spadarožnikavyja zdymki z Kitaja

Iran atrymaŭ ad kitajskich kampanij spadarožnikavyja zdymki vysokaha razroźnieńnia pierad rakietnym udaram pa amierykanskaj bazie ŭ Iardanii, a taksama paśla ataki. Pra heta paviedamiła vydańnie The Wall Street Journal sa spasyłkaj na amierykanskich čynoŭnikaŭ.

Pachavańnie amierykanskich vajskoŭcaŭ, zahinułych padčas ataki na bazu ŭ Iardanii. Fota: Spencer Platt/Getty Images

Havorka idzie pra ataku 17 lipienia, kali Iran zapuściŭ balistyčnyja rakiety pa avijabazie Muvafak-Sałci na paŭnočnym uschodzie Iardanii. U vyniku ŭdaru zahinuli troje amierykanskich vajskoŭcaŭ, jašče čaćviora atrymali ranieńni.

Pavodle krynic vydańnia, jašče za niekalki miesiacaŭ da ataki administracyja Donalda Trampa papiaredžvała Piekin, što kitajskija kampanii mohuć pieradavać Iranu spadarožnikavyja zdymki. Paśla ŭdaru Vašynhton pieradaŭ kitajskim uładam materyjały, jakija, na dumku amierykanskaha boku, śviedčyli pra suviaź Kitaja z atakaj na bazu. Adnak u Piekinie hetyja abvinavačańni adchilili.

Amierykanskija čynoŭniki nie nazvali kampanii, jakija mahli pieradavać zdymki Iranu, i nie śćviardžali, što ŭłady Kitaja niepasredna ŭdzielničali ŭ hetaj pieradačy.

Paviedamleńnie pra mahčymuju pieradaču spadarožnikavych danych moža jašče bolš abvastryć adnosiny pamiž ZŠA i Kitajem napiaredadni zapłanavanaj na 24 vieraśnia sustrečy Donalda Trampa i Si Czińpina.

Pavodle The Wall Street Journal, paśla taho jak Tramp zajaviŭ svajoj kamandzie, što zachavańnie dobrych adnosin ź Piekinam i Si Czińpinam źjaŭlajecca dla jaho pryjarytetam, vysokapastaŭlenyja amierykanskija čynoŭniki stali paźbiahać adkrytych kanfliktaŭ z Kitajem. U aficyjnych zajavach jany taksama imknucca nie pierabolšvać značeńnie mahčymaj kitajskaj dapamohi Iranu.

Praź niekalki dzion paśla ŭdaru pa amierykanskaj bazie dziaržsakratar ZŠA Marka Rubia sustreŭsia ź ministram zamiežnych spraŭ Kitaja Van I. Paśla pieramoŭ Rubia nie staŭ prama adkazvać na pytańnie, ci pieradavaŭ Kitaj Iranu spadarožnikavyja zdymki. Jon tolki zajaviŭ, što «nivodnaje ź dziejańniaŭ Kitaja nijakim čynam nie źmianiła chod kanfliktu».

Kamientary da artykuła