Tramp adkłaŭ eskałacyju vajny ź Iranam praź niastaču rakiet SPA — The New York Times
Prezident ZŠA Donald Tramp pakul admoviŭsia ad płanaŭ rezka ŭzmacnić vajskovuju kampaniju suprać Irana. Razvarotu ŭ rašeńni spryjali papiaredžańni vajskoŭcaŭ pra ryzyku chutkaha vyčerpvańnia zapasaŭ rakiet dla sistem supraćpavietranaj abarony Patriot dy inšych srodkaŭ SPA na Blizkim Uschodzie, paviedamlaje The New York Times sa spasyłkaj na krynicy ŭ Biełym domie.
Pavodle danych vydańnia, klučavaja razmova adbyłasia padčas narady z daradcami i členami kabinieta. Staršynia Abjadnanaha kamiteta načalnikaŭ štaboŭ hienierał Den Kiejn papiaredziŭ Trampa, što maštabnyja ŭdary vykličuć jašče bolš mahutny adkaz Tehierana. Heta pryviadzie da rezkaha raschodu pierachopnikaŭ, nieabchodnych dla abarony amierykanskich baz u Iardanii, Kuviejcie, Bachrejnie i AAE.
Situacyja z bojeprypasami, pavodle vydańnia, užo dasiahnuła krytyčnaha ŭzroŭniu — da kanca krasavika Pientahon vydatkavaŭ bolš za 1200 rakiet-pierachopnikaŭ Patriot koštam 4 młn dalaraŭ kožnaja. Z taho času, pavodle acenak vajskoŭcaŭ, stan zapasaŭ tolki pahoršyŭsia.
Akramia deficytu rakiet, u administracyi pabojvajucca šyrejšych nastupstvaŭ eskałacyi: uciahvańnia sajuźnikaŭ u Piersidskim zalivie ŭ kanflikt, novaha skačka cen na enierhanośbity, ekanamičnaha kryzisu i mihracyjnaha cisku. Da taho ž častka čynoŭnikaŭ sumniavajecca, što vajenny cisk prymusić Iran sieści za stoł pieramoŭ, a nie zhurtuje jaho kiraŭnictva.
Zamiest maštabnaj vajskovaj apieracyi ŭ Biełym domie razhladajuć inšy płan, jaki padtrymlivajuć daradcy Trampa, u tym liku Džared Kušnier. Płan praduhledžvaje praciah pieramoŭ z Tehieranam u spałučeńni z uzmacnieńniem ekanamičnaha cisku i sankcyj.
Ciapier čytajuć
U Čechii palaki źbili palaka, pryniaŭšy jaho za ŭkrainca z-za šapki ŭ kolerach Vierchniaj Silezii. Chłopiec jechaŭ u viełaprabieh dziela chvoraj na rak ciažarnaj partniorki2525
Kamientary