Zakryvać ci nie zakryvać viečka ŭnitaza pierad zmyvańniem?

Adny zaŭsiody zakryvajuć viečka ŭnitaza pierad zmyvańniem, inšyja nie bačać u hetym nijakaha sensu. Navukoŭcy praanalizavali vyniki 22 daśledavańniaŭ, kab vyśvietlić, chto maje racyju. Pra ich vysnovy piša IFLScience.

Fota: vecteezy

U tualecie jość rečy, pra jakija bolšaść z nas prosta nie zadumvajecca. Naprykład, što adbyvajecca ŭ pieršyja siekundy paśla taho, jak my naciskajem knopku zmyvańnia.

U hety momant nad unitazam utvarajecca aerazol ź mikraskapičnych kropiel, jakija mohuć utrymlivać roznyja mikraarhanizmy. Siarod ich patencyjna mohuć być i ŭzbudžalniki zachvorvańniaŭ.

Navukoŭcy z Univiersiteta Flindersa ŭ Aŭstralii vyrašyli vyśvietlić, ci moža viečka paŭpłyvać na jaho raspaŭsiudžvańnie. Dla hetaha jany praanalizavali 22 raniej apublikavanyja daśledavańni. U ich vykarystoŭvalisia roznyja typy tualetaŭ i sistemy zmyvańnia, a ŭ niekatorych ekśpierymientach u vadu śpiecyjalna dadavali bakteryi, kab prasačyć za ich raspaŭsiudžvańniem.

Analiz pakazaŭ niečakanuju reč. Zakryćcio viečka, vidać, nie nadta ŭpłyvaje na ahulnuju kolkaść aerazolu, jaki vyryvajecca z unitaza. Roźnica ŭ inšym.

Z adkrytaha ŭnitaza čaścinki svabodna padymajucca ŭvierch i šyrej raźlatajucca pa pamiaškańni. Kali ž viečka zakrytaje, jany vychodziać praz ščyliny pamiž im, siadzieńniem i krajem čašy. Takim čynam, viečka nie stolki spyniaje aerazol, kolki źmianiaje kirunak jaho ruchu.

I heta moža mieć značeńnie. Pry adkrytym viečku čaścinki zdolnyja padymacca na vyšyniu, dzie čałaviek moža ich udychnuć. Pry zakrytym takaja imaviernaść moža być mienšaj.

Mahčyma, značeńnie maje i kanstrukcyja ŭnitaza, u pryvatnaści, pamier ščylin pamiž viečkam, siadzieńniem i čašaj.

Pamienšyć kolkaść aerazolu mohuć i inšyja miery. Kali va ŭnitazie jość dva režymy zmyvańnia, pry mahčymaści varta vybirać mienšy abjom vady.

Dapamahčy moža i dobraja vientylacyja, choć vyniki daśledavańniaŭ na hety kont pakul nie byli statystyčna pierakanaŭčymi.

Važnaja i rehularnaja čystka tualeta. Jana nie spynić utvareńnie kropiel, zatoje pamienšyć kolkaść mikraarhanizmaŭ, jakija mohuć razam ź imi trapić u pavietra.

Pry hetym daśledavańniaŭ, u jakich niepasredna paraŭnoŭvali zmyvańnie z adkrytym i zakrytym viečkam, pakul niašmat, tamu aŭtary nie ličać vysnovy kančatkovymi. Tym nie mienš viadučaja aŭtarka daśledavańnia Lira Adyjani raić zakryvać viečka pierad zmyvańniem jak mieru zaściarohi.

Kamientary da artykuła