Donald Tramp zajaviŭ, što Rasija i Ukraina pahadzilisia na enierhietyčnaje pieramirje

Prezident ZŠA Donald Tramp zajaviŭ, što Ukraina pahadziłasia spynić udary pa rasijskich enierhietyčnych abjektach. Pra heta Tramp paviedamiŭ 14 vieraśnia ŭ svajoj sacyjalnaj sietcy Truth Social. Pry hetym jon śćviardžaje, što havorka idzie pra ŭzajemnuju damoŭlenaść: nie tolki Ukraina, ale i Rasija nibyta pahadziłasia nie atakavać enierhietyčnuju infrastrukturu druhoj krainy.

Udar Ukrainy pa NPZ pad Maskvoj. Skrynšot ź videa

«Ukraina pahadziłasia nie bić pa rasijskich enierhietyčnych abjektach. Rasija pahadziłasia zrabić toje ž samaje!» — napisaŭ amierykanski prezident.

Takim čynam, u vypadku vykanańnia hetaj damoŭlenaści ŭdary pa naftavych i inšych enierhietyčnych abjektach Rasii z boku Ukrainy pavinny spynicca, a Rasija, u svaju čarhu, pavinna ŭstrymacca ad anałahičnych atak na ŭkrainskuju enierhietyčnuju infrastrukturu.

Pry hetym z paviedamleńnia nie vynikaje, kali mienavita była dasiahnutaja takaja damoŭlenaść, na jaki termin jana raźličanaja i ci isnuje asobnaje aficyjnaje pahadnieńnie pamiž bakami. U zajavie Trampa havorycca tolki pra nibyta zhodu bakoŭ spynić ataki na enierhietyčnyja abjekty.

U svajoj publikacyi Tramp taksama źviazaŭ vajnu va Ukrainie z rostam suśvietnych cen na dyzielnaje paliva. Pavodle jaho, asnoŭnaj pryčynaj hetaha padaražańnia źjaŭlajecca mienavita vajna pamiž Rasijaj i Ukrainaj, a nie kanflikt vakoł Irana.

Takaja interpretacyja raźličanaja na amierykanskich vybarcaŭ. Błakada Armuzskaha pralivu Tehieranam u adkaz na ŭdary pa Iranie pryviała da rostu cenaŭ na naftu, što stała adnym z važnych unutrypalityčnych pytańniaŭ u ZŠA pierad pramiežkavymi vybarami ŭ Kanhres. Demakratyčnaja partyja vinavacić administracyju Trampa ŭ niekampietentnaści i pralikach.

Kamientary da artykuła