Zialenski vykazaŭsia za enierhietyčnaje pieramirje z Rasijaj, ale sumniajecca, što jana budzie jaho vykonvać

Paśla zajavy prezidenta ZŠA Donalda Trampa pra nibyta dasiahnieńnie enierhietyčnaha pieramirja pamiž Rasijaj i Ukrainaj prezident Ukrainy Uładzimir Zialenski daŭ zrazumieć, što Kijeŭ sapraŭdy hatovy da takoj damoŭlenaści, ale sumniavajecca, što Rasija budzie jaje vykonvać.

Uładzimir Zialenski. Fota: Byron Smith/Getty Images

Zialenski zajaviŭ, što Ukraina ŭžo prapanoŭvała partnioram damovicca z Rasijaj ab spynieńni ŭzajemnych udaraŭ pa krytyčnaj infrastruktury. Adnak, pavodle jaho, pakul niama ŭpeŭnienaści, što Rasija sapraŭdy choča prytrymlivacca lubych padobnych damoŭlenaściaŭ.

Ukrainski prezident padkreśliŭ, što kali partniory zmohuć harantavać realnaje vykanańnie Rasijaj abaviazacielstva nie atakavać ukrainskuju elektraenierhietyku, inšyja enierhietyčnyja abjekty, krytyčnuju infrastrukturu i šlachi pieravozki charčavańnia, to Ukraina taksama hatovaja ŭstrymacca ad adpaviednych udaraŭ pa rasijskich abjektach.

Pry hetym Zialenski nastojvaje, što takaja damoŭlenaść pavinna być nadziejnaj i doŭhaterminovaj, a nie časovaj mieraj. Jon papiaredziŭ, što nie choča situacyi, kali napružanaść časova źnizicca, a paśla praviadzieńnia ŭ Rasii «vybaraŭ» usio vierniecca da raniejšaha stanu.

Zialenski taksama źviazaŭ mahčymuju časavuju paŭzu ź situacyjaj na rynku paliva. Pavodle jaho, Rasija moža być zacikaŭlenaja ŭ časovym źmiakčeńni napružanaści, kab na pieryjad svaich «vybaraŭ» atrymać palohku z prablemami ź bienzinam i dyzielnym palivam.

Prezident Ukrainy zajaviŭ, što ciapier čakaje ad mižnarodnych partnioraŭ kankretnych prapanoŭ i miechanizmaŭ, jakija mahli b zabiaśpiečyć vykanańnie takoj damoŭlenaści.

Na momant publikacyi materyjału aficyjnaj reakcyi Maskvy na zajavy Trampa i Zialenskaha jašče nie było.

Raniej prezident ZŠA Donald Tramp zajaviŭ, što Ukraina nibyta pahadziłasia nie nanosić udaraŭ pa rasijskich enierhietyčnych abjektach, a Rasija, pavodle jaho słoŭ, zhodnaja dziejničać hetak ža. Pra heta jon napisaŭ u svajoj sacyjalnaj sietcy Truth Social.

Kamientary da artykuła