Hrybnaja chvala pajšła ŭ Minsku. Haradžanie publikujuć FOTY baravikoŭ i apieniek, naźbiranych u stalicy

Hrybnaja chvala dakaciłasia da Minska: haradžanie źbirajuć hryby prosta ŭ miežach stalicy. U jakich łakacyjach možna natknucca na pień z apieńkami i dužyja maładyja padasinaviki, daviedałasia ahienctva «Minsk-Naviny».

Miarkujučy pa kamientarach u adnym z tematyčnych telehram-kanałaŭ, samym hrybnym miescam stalicy možna nazvać lesapark «Miadźviedžyna». U hłuchich kutkach hetaj uparadkavanaj łakacyi traplajucca padasinaviki, padbiarozaviki, baraviki i apieńki.

«Bukiet z padasinavikaŭ. Lesapark «Miadźviedžyna», 10.09.26. Pobač jašče niekalki malusieńkich vyłaziać», — padpisała fota z maładymi čyrvonahałovikami minčanka Taćciana.

Hrybnaja ŭdača ŭ hety dzień uśmichnułasia joj jašče nie raz: uśled žančyna apublikavała šerah fota, na jakich siarod padasinavikaŭ bačny i dziabioły baravik. Zdymak jašče adnaho baravika ź Miadźviedžyna haradžanka apublikavała 13 vieraśnia.

Ščodraja zialonaja zona ŭ Frunzienskim rajonie i na inšyja hryby.

«Vyrašyli ŭ piatnicu prahulacca ŭ Miadźviedžyna z dačkoj, — padzialiłasia minčanka Palina. — Za paru hadzin znajšli mnostva hryboŭ: trapilisia nam i hnajaviki, i daždžaviki, i staryja padbiarozaviki, i padasinaviki. A pad kaniec prahulanki natknulisia na pień, usypany dziabiołymi apieńkami. Radaści dački nie było miežaŭ!»

Natykajucca na hryby i tyja, chto adpačyvaje ŭ zialonych zonach Pieršamajskaha rajona — parku imia Čaluskincaŭ i Centralnym bataničnym sadzie NAN Biełarusi. U pieršym niadaŭna znajšli šmat apieniek, u druhim u minułyja vychadnyja — babku.

Zrešty, źbirać hrybny ŭradžaj možna i ŭ najbližejšym pryharadzie, naprykład, na Minskim mory — tam šaniec pajechać nie z pustymi rukami na paradak vyšejšy.

«Minskaje mora, 6‑y plaž… Pryjechali šašłyk pasmažyć, nazyvajecca», — padpisaŭ učorašnija foty minčuk Leanid.

Kamientary da artykuła