Čynoŭniki adreahavali na dzikuju historyju pra rody ŭ Minsku — parušeńniaŭ jany nie znajšli

Sotni tysiač prahladaŭ atrymała historyja biełaruski, jakaja skardziłasia na parušeńni padčas rodaŭ u 5‑j minskaj radzilni. Ciapier kamisija, što musiła rasśledavać toj vypadak, dasłała žančynie adkaz — pavodle jaho, vinavatych niama.

Fota: roddom5.minsk / Instagram

Biełaruska pad nikam annasooliate apublikavała svaju historyju 28 žniŭnia. Hanna raskazała, što 18 krasavika jana naradziła ŭ 5‑j minskaj radzilni dzicia, i padzialiłasia składanaściami padčas rodaŭ.

Pavodle jaje słoŭ, miedyki pamyłkova zanizili vahu dziciaci, praz što admovili žančynie ŭ kiesaravym siačeńni, admovili joj u paŭnavartasnaj anestezii i cisnuli na jaje, kab atrymać zhodu na miedycynskuju manipulacyju — amnijatamiju (prakoł płodnaha puchira). Žančyna naradziła sama, ale rody byli składanyja. Paśla vypiski ŭ Hanny znajšli infiekcyju močapałavych šlachoŭ i prablemy sa švami.

U kamitecie achovy zdaroŭja Minharvykankama stvaryli kamisiju, kab razabracca ŭ historyi Hanny. Ciapier žančynie dasłali adkaz.

Pavodle taho adkazu, Hannu špitalizavali ŭ radzilniu, kali jana pieranasiła dzicia na 12 dzion. Pry hetym sama Hanna śćviardžaje, što nijakaha pieranošvańnia nie było, i daktary ŭ radzilni prosta samavolna pamianiali termin ciažarnaści. Praź pieranošvańnie, pišuć u adkazie, rody treba było stymulavać, inakš mahli b być uskładnieńni.

Što da amnijatamii, to ŭ adkazie nahadvajuć, što Hanna dała piśmovuju zhodu na manipulacyju. Ale nie śviedčać pra cisk, a pišuć pra «tłumačeńnie doktaram mahčymych ryzykaŭ pry admovie». Pavodle tekstu adkazu, u Hanny padčas vypiski nie było prykmietaŭ zapalenčaha pracesu. U svaim kamientary žančyna źviartaje ŭvahu, što padčas vypiski mieła drenny analiz kryvi z vysokimi pakazčykami lejkacytaŭ i bakteryj, a potym u pryvatnym centry joj pryznačyli ekstrany kurs antybijotykaŭ, bo znajšli ŭ Hanny zapalenčy infiltrat.

U vyniku, pišacca ŭ adkazie, z žančynaj u radzilni abychodzilisia pavodle kliničnaha pratakoła. Taksama čynoŭniki nie vyjavili faktaŭ parušeńnia miedyčnaj etyki ŭ bok Hanny, u tym liku praz toje, što videazapisy ŭ radzilni zachoŭvajucca tolki 30 dzion.

Sama Hanna nie hatovaja mirycca z takim adkazam. Žančyna płanuje abskardzić jaho, a potym i źviarnucca ŭ prakuraturu.

Kamientary da artykuła