Navukoŭcy vyjavili niečakanuju pryčynu prablem z seksam u maładych mužčyn

Prablemy z erekcyjaj pryniata źviazvać z uzrostam, chvarobami abo psichałahičnymi ciažkaściami. Adnak z takimi parušeńniami sutykajucca i maładyja mužčyny, i navukoŭcy praciahvajuć vyśviatlać, što moža stajać za hetym.

Novaje daśledavańnie kitajskich navukoŭcaŭ, na jakoje źviartaje ŭvahu Daily Mail, vyjaviła jašče adzin faktar, jaki moža istotna ŭpłyvać na seksualnaje zdaroŭje mužčyn.

Daśledčyki ź Miedycynskaj škoły Čžeczianskaha ŭniviersiteta vyvučyli 826 mužčyn ad 22 da 40 hadoŭ, jakija pracavali poŭny dzień.

Navukoŭcy aceńvali piać pryčyn, jakija mahli spryjać stresu na pracy: praciahłaść pracy, samastojnaść u pryniaćci rašeńniaŭ, padtrymku z boku kiraŭnictva, adnosiny z kalehami i cisk, źviazany z atrymańniem pavyšeńnia.

Adnačasova jany vyśviatlali, ci majuć udzielniki ciažkaści z dasiahnieńniem abo padtrymańniem erekcyi, a taksama vymiarali ŭzrovień harmonaŭ.

I tut vyjaviłasia istotnaja roźnica. Siarod mužčyn, jakija adčuvali najbolšy stres na pracy, tyja ci inšyja parušeńni erektylnaj funkcyi mieli kala 54%. U hrupie z najmienšym uzroŭniem stresu — tolki 8%.

Adnym z hałoŭnych faktaraŭ akazałasia praciahłaść pracoŭnaha dnia. Najbolš stresavanaja hrupa pracavała ŭ siarednim 65 hadzin na tydzień, ci kala 13 hadzin na dzień pry piacidzionnym pracoŭnym tydni. U hrupie z najmienšym stresam hety pakazčyk składaŭ kala 42 hadzin.

U mužčyn, jakija pracavali najbolš i adčuvali najmacniejšy stres, šancy sutyknucca z erektylnaj dysfunkcyjaj byli bolš čym u dziesiać razoŭ vyšejšyja.

Jašče bolš pakazalnaj była roźnica ŭ ciažkich vypadkach. Umieranuju abo ciažkuju erektylnuju dysfunkcyju vyjavili prykładna ŭ kožnaha piataha mužčyny, jaki adčuvaŭ najbolšy stres na pracy. Siarod udzielnikaŭ z najmienšym uzroŭniem stresu — prykładna ŭ adnaho sa sta.

Pavodle aŭtaraŭ daśledavańnia, praciahłaja praca była adnym z hałoŭnych faktaraŭ, źviazanych z paharšeńniem erektylnaj funkcyi. A padtrymka z boku kiraŭnika, naadvarot, mieła achoŭny efiekt.

Daśledavańnie vyjaviła i istotnuju roźnicu va ŭzroŭni harmonaŭ. U mužčyn, jakija adčuvali najbolšy stres na pracy, ranišni ŭzrovień harmonu stresu kartyzołu byŭ prykładna na 74% vyšejšy, a voś uzrovień testasteronu, naadvarot, byŭ amal na 40% nižejšy ŭ paraŭnańni z tymi, chto mieŭ najmienšy ŭzrovień tryvohi z-za pracy.

Jak tłumačać śpiecyjalisty, praciahły stres moža trymać arhanizm u stanie pastajannaj hatoŭnaści da niebiaśpieki, viadomym jak režym «bi abo ŭciakaj». Ličycca, što ŭ takich umovach arhanizm u pieršuju čarhu padtrymlivaje funkcyi, nieabchodnyja dla vyžyvańnia, u toj čas jak repraduktyŭnaja i seksualnaja funkcyi adychodziać na druhi płan.

Pavyšany ŭzrovień kartyzołu, u svaju čarhu, moža ŭpłyvać na vypracoŭku testasteronu, jaki maje važnaje značeńnie dla seksualnaha žadańnia.

Pryčym daśledčykam udałosia prasačyć paśladoŭnaść hetych źmien. Uzrovień kartyzołu zvyčajna pavyšaŭsia za dva-čatyry tydni da taho, jak pačynaŭ padać testasteron. A źnižeńnie testasteronu na čatyry-šeść tydniaŭ papiaredničała paharšeńniu erektylnaj funkcyi.

Na dumku aŭtaraŭ, heta moža aznačać, što pamiž uzmacnieńniem stresu i źjaŭleńniem seksualnych razładaŭ isnuje svojeasablivaje «akno», kali svoječasovaje źnižeńnie stresu moža dapamahčy praduchilić raźvićcio prablem.

• 1
• 0
• 0
• 3
• 1
• 3
• 1
• 0