Prapusknuju zdolnaść «Kamiennaha Łoha» pavialičać u try razy

Rekanstrukcyju punkta propusku «Kamienny Łoh» na biełaruska-litoŭskaj miažy płanujuć pačać užo ŭ hetym hodzie, a zaviaršyć raboty — da 2029 hoda. Pra heta na pres-kanfierencyi paviedamiŭ načalnik hałoŭnaha ŭpraŭleńnia arhanizacyi mytnaha kantrolu Dziaržaŭnaha mytnaha kamiteta Viktar Zubik.

Zdymak ilustracyjny. Fota: Dziaržaŭny pamiežny kamitet

Pavodle słoŭ čynoŭnika, paśla rekanstrukcyi prapusknaja zdolnaść punkta pavinna pavialičycca prykładna ŭ try razy. Raźlikovy pakazčyk składzie da 6 tysiač aŭtamabilaŭ u sutki.

Pradstaŭnik Dziaržaŭnaha mytnaha kamiteta adznačyŭ, što ciapier punktaŭ propusku ŭžo nie chapaje dla patrebnych abjomaŭ ruchu. Adnačasova ŭłady pracujuć nad tym, kab zrabić pierasiačeńnie miažy bolš zručnym dla biełaruskich hramadzian. Dla hetaha na ŭsich punktach propusku ŭvodziacca zony čakańnia i elektronnaja čarha.

Viktar Zubik taksama nahadaŭ, što sioleta pa ŭsioj krainie źjaviłasia mahčymaść dystancyjnaj rehistracyi transpartnych srodkaŭ dla pierasiačeńnia miažy. Čałaviek moža jašče doma zarehistravacca ŭ tym punkcie propusku, praź jaki płanuje jechać, sačyć za rucham čarhi i raźličyć čas prybyćcia. Pavodle jaho słoŭ, heta dazvoliła admovicca ad tak zvanaha «žyvoha» stajańnia ŭ čarzie.

Akramia taho, z 1 studzienia hetaha hoda dla lehkavych aŭtamabilaŭ, a z 1 krasavika i dla hruzavikoŭ dziejničaje płatnaja pasłuha braniravańnia daty pierasiačeńnia dziaržaŭnaj miažy. Pavodle infarmacyi Dziaržaŭnaha mytnaha kamiteta, hetaja pasłuha karystajecca popytam.

Kamientary da artykuła