U Izraili pry dapamozie sakretnaj ahientki vykryli sietku, jakaja ŭciahvała biełarusak u prastytucyju

U Izraili palicyja raskryła bujnuju mižnarodnuju złačynnuju sietku, jakaja zajmałasia viarboŭkaj i pieravozkaj žančyn ź Biełarusi ŭ Izrail dla zaniatkaŭ prastytucyjaj. Klučavuju rolu ŭ rasśledavańni adyhrała sakretnaja ahientka, jakaja pracavała pad prykryćciom u Biełarusi i Izraili. Pa vynikach apieracyi izrailskaja palicyja i prakuratura rychtujuć abvinavačańni suprać dvuch mierkavanych arhanizataraŭ schiemy, piša IsraelInfo.

Zdymak ilustracyjny. Fota: magnific.com

Sakretnaja ahientka vydavała siabie za dziaŭčynu, jakaja šukaje pracu. Jana źviazałasia ź izrailskimi kiraŭnikami sietki, zmahła ŭvajści ŭ davier da kiraŭnictva złačynnaj hrupy i sabrała dokazy ich supraćpraŭnaj dziejnaści.

Śledstva vyjšła na dvuch hałoŭnych padazravanych, jakija, pavodle źviestak palicyi, stajali na čale sietki. Heta 37‑hadovy Alaksandr Zinhier z horada Bieer-Ševa i 42‑hadovy Jakaŭ Mirmovič z Ejłata. Abodva raniej nie byli sudzimyja. Im staviać u vinu arhanizacyju masavaha ŭvozu žančyn ź Biełarusi, suteniorstva, niezakonnuju ekspłuatacyju i admyvańnie hrošaj, atrymanych złačynnym šlacham.

Vykarystańnie ahienta pad prykryćciom stała faktyčnym paŭtoram śpiecapieracyi, praviedzienaj hod tamu. Tady izrailskija apieratyŭniki razam z Raźviedvalnym upraŭleńniem i biełaruskimi siłavikami raskryli padobny kanał pastaŭki žančyn ź Biełarusi ŭ Izrail.

U žniŭni minułaha hoda žycharka Biełarusi pahadziłasia supracoŭničać ź izrailskaj palicyjaj u jakaści sakretnaj ahientki. Jana źviazałasia ź izrailskimi arhanizatarami prastytucyi, jakija paabiacali joj harantavany zarobak u dziasiatki tysiač šekielaŭ u miesiac (1 šekiel — kala 0,33 dalara). Ahientka prybyła ŭ tel-aviŭski aeraport Ben-Huryjon pad niehałosnym supravadžeńniem izrailskich śledčych, sabrała dokazy i raskryła arhanizataraŭ sietki.

Pa vynikach toj apieracyi abvinavačańni byli vystaŭlenyja trom čałaviekam.

Kamientary da artykuła