Prymusovyja aborty i prodaž cnatlivaści. Byłaja hiejša raskazała pra ciomny bok svajoj pracy

Uviečary ŭ vuzkich zavułkach Pantačo — adnaho ź piaci tradycyjnych kvartałaŭ hiejš u byłoj japonskaj stalicy Kijota — i siońnia možna ŭbačyć dziaŭčat u raskošnych kimano i biełym hrymie, jakija chutka śpiašajucca ŭ «očaja» — tradycyjnyja čajnyja damy, dzie hiejšy zabaŭlajuć haściej. Draŭlanyja sandali hučna stukajuć pa kamianiach, a sami majko — vučanicy-hiejšy — trymajuć hałovy apuščanymi, jak taho patrabuje tradycyja.

Hetyja kvartały nazyvajuć «chanamačy» — litaralna «horad kvietak». Mienavita tam tradycyjna žyvuć i pracujuć hiejšy. Japoncy taksama vykarystoŭvajuć bolš paetyčnuju nazvu — «śviet viarby». Kvartał doŭhi čas ličyŭsia zakrytym i amal niedasiažnym dla bolšaści ludziej.

U Kijota siońnia pracuje kala 70 majko i jašče prykładna 100 hejko — tak u horadzie nazyvajuć hiejš. Majko zvyčajna vučacca kala šaści hadoŭ pad nahladam starejšaj «siastry», pierš čym stać paŭnavartasnymi hejko. Jany vyvučajuć tradycyjnyja tancy, muzyku, mastactva razmovy i praviły etykietu. Ich zadača — padtrymlivać vytančanuju atmaśfieru padčas viečaroŭ u «očaja».

U adroźnieńnie ad kurtyzanak «ojran», jakija pracavali ŭ histaryčnych «kvartałach zadavalnieńniaŭ», hiejšy pavinny byli zabaŭlać haściej razmovami, tancami, muzykaj i ahulnaj atmaśfieraj.

Błytanina pamiž hiejšami i kurtyzankami častkova tłumačyć stereatypy vakoł kultury pieršych. «Ojran» taksama nasili bieły hrym i raskošnyja kimano, ale pojas u ich zaviazvaŭsia śpieradu — dla chutkaha raspranańnia. U hiejš pojas zaviazvajuć zzadu.

Pavialičyć

Na dumku daśledčykaŭ, tradycyjny śviet hiejš pačaŭ chutka źmianiacca paśla 1960‑ch. Aŭtar knih pra hiejš Chisafumi Ivašyta adznačaje, što mienavita ŭ toj pieryjad chanamačy dasiahnuli svajho roskvitu, ale ŭžo ŭ nastupnym dziesiacihodździ pačaŭsia zaniapad.

Jon źviazvaje heta z tym, što ŭ Japonii pačali krytyčna stavicca da zakrytych sustreč palitykaŭ i biznesmienaŭ u kampanii maładych žančyn. Akramia taho, z raźvićciom mižnarodnaha biznesu zabaŭlać zamiežnych partnioraŭ u kampanii hiejš stanaviłasia ŭsio mienš prymalna.

Pavodle acenak Ivašyty, siońnia kolkaść hiejš u Japonii składaje kala adnaho pracenta ad uzroŭniu 1960‑ch hadoŭ. Bahatyja patrony, jakija kaliści hadami finansava padtrymlivali hiejš, ciapier amal źnikli.

Viečar u kampanii hiejšy siońnia moža kaštavać turystu kala 700 dalaraŭ, a dla japoncaŭ dostup u hety śviet časta patrabuje składanaj sistemy znajomstvaŭ i darahich padarunkaŭ. Tamu, pavodle Ivašyty, bolšaść žycharoŭ krainy nikoli nie sustrakalisia z hiejšami asabista i majuć pra ich žyćcio tolki vielmi ahulnaje ŭjaŭleńnie.

Na hetym fonie asabliva rezanansna prahučali słovy byłoj vučanicy-hiejšy Kijochi Kirytaki, jakaja nazvała hety śviet «sistemaj rabstva».

Zakryty «śviet viarby»

Kirytaka vyrasła ŭ sielskaj prefiektury Jamahučy na paŭdniovym zachadzie Japonii. U padletkavym uzroście jana maryła stać madellu, zajmałasia tradycyjnymi japonskimi tancami i supracoŭničała z ahienctvam talentaŭ.

Kali Kirytacy było 15 hadoŭ, paśla adnaho vystupleńnia da jaje padyšoŭ biznesoviec, jaki mieŭ suviazi ŭ śviecie hiejš Kijota, i prapanavaŭ stać majko. Pavodle słoŭ samoj dziaŭčyny, jaje siamja ŭ toj čas mieła finansavyja ciažkaści, a praciah adukacyi vyhladaŭ małavierahodnym. Tamu jana pahadziłasia.

U lutym 2015 hoda, jašče da zakančeńnia škoły, Kirytaka pierajechała ŭ «okija» — tradycyjny dom, dzie žyvuć vučanicy-hiejšy i darosłyja hiejšy, — i pačała padrychtoŭku. U krasaviku, užo va ŭzroście 16 hadoŭ, jana aficyjna ŭvajšła ŭ «śviet viarby» i atrymała imia hiejšy. A ŭ listapadzie taho ž hoda debiutavała jak majko ŭ kvartale Pantačo.

Ale vielmi chutka, pavodle jaje słoŭ, usio pačało razburacca, i ŭžo praz vosiem miesiacaŭ dziaŭčyna ŭciakła.

Pavialičyć

Pavodle jaje słoŭ, realnaść akazałasia dalokaj ad taho vobraza, jaki bačać turysty i navat bolšaść japoncaŭ. Unutry hetaha śvietu, śćviardžaje Kirytaka, dziaŭčatam faktyčna zabaraniali mieć ułasnaje mierkavańnie. Jany pavinny byli pastajanna ŭśmichacca, padparadkoŭvacca starejšym i nikoli nie piarečyć praviłam.

Najbolš ciažkimi dla jaje byli pavodziny klijentaŭ, jakija dazvalali sabie seksualnyja damahańni. Pry hetym u śviecie hiejš isnavała niehałosnaje praviła: dziaŭčaty, jakija adchilajuć zalacańni pjanych mužčyn, doŭha tam nie zatrymajucca.

U domie, dzie žyła Kirytaka, pojas kimano zaviazvali vielmi tuha nad hrudźmi, kab mužčyny nie mahli prasunuć ruki pad vopratku. Ale heta nie spyniała klijentaŭ — jany prosta załazili rukami pad kimano sa śpiny, kala šyi.

Klijenty sprabavali całavać jaje ŭ taksi pa darozie pamiž restaranami. Niahledziačy na ŭzrost, dziaŭčynu zaachvočvali ŭdzielničać u hulniach z ałkaholem.

Kirytaka raskazvaje, što adnojčy joj paviedamili: jana pavinna razam ź inšaj hiejšaj i mužčynam-klijentam pajści ŭ tradycyjnuju łaźniu «onsen».

Ad toj situacyi dziaŭčynu vyratavała starejšaja hejko: jana naŭmysna stuknuła Kirytaku hałavoj ab ścianu, kab taja mahła zrabić vyhlad, što joj kiepska i jana nie moža ŭdzielničać.

Z časam Kirytaka pačuła ad inšych žančyn jašče bolš tryvožnyja historyi. Pavodle jaje słoŭ, niekatorych majko prymušali rabić aborty paśla suviaziaŭ z upłyvovymi mužčynami. Žančyny nie atrymlivali psichałahičnaj dapamohi i bajalisia havaryć pra toje, što adbyvałasia. Mužčyny, pra jakich išła havorka, mieli vialiki palityčny i finansavy ŭpłyŭ.

Apošniaj kroplaj dla Kirytaki stała navina pra toje, što kiraŭnica okija — doma, dzie žyli i navučalisia majko, — arhanizavała prodaž jaje cnatlivaści. Unutry hetaj sistemy heta nazyvali «sistemaj muža». Staŭki, pavodle jaje słoŭ, dasiahnuli 400 tysiač dalaraŭ pa kursie taho času.

Paśla hetaha Kirytaka vyrašyła ŭciačy. Paźniej jana napisała manhu «Kijockija chanamačy — heta piekła na ziamli» («Kyoto Hanamachi is Hell on Earth»), zasnavanuju na ŭłasnym dośviedzie i historyjach inšych dziaŭčat.

Pavialičyć

Reputacyja pad pahrozaj

Kijocki fond padtrymki tradycyjnych sceničnych mastactvaŭ, jaki adkazvaje za piać kvartałaŭ hiejš, kateharyčna admaŭlaje ŭsie abvinavačańni. U arhanizacyi śćviardžajuć, što niepaŭnaletnich nie prymušajuć pić ałkahol, žančyny nie prymajuć vanny z klijentami, a samich majko abaraniajuć ad seksualnych damahańniaŭ.

Tym nie mienš historyja Kirytaki mocna ŭdaryła pa reputacyi hetaha zakrytaha śvietu. Jak adznačaje hanarovaja prafiesarka biznes-škoły Dosisia ŭ Kijota Noryka Chama, kali hetyja historyi praŭdzivyja, havorka idzie pra faktyčny čorny rynak maładych žančyn.

Pavodle jaje słoŭ, śviet hiejš dziesiacihodździami sprabavaŭ admiežavacca ad asacyjacyj z prastytucyjaj, i tamu padobnyja historyi staviać pad pahrozu adzin z hałoŭnych pryncypaŭ, na jakich trymałasia jaho reputacyja.

Piter Makintoš — kanadski daśledčyk kultury hiejš, jaki žyvie ŭ Kijota z 1993 hoda i raniej byŭ žanaty z hiejšaj, — ličyć, što Kirytaka mahła niešta pierabolšyć, ale pryznaje: złoŭžyvańni mahli isnavać u asobnych okija.

Pavodle Makintoša, paśla skandału, vyklikanaha publikacyjaj manhi i abvinavačańniami byłoj majko, u kvartałach hiejš uzmacnili kantrol za ałkaholem dla niepaŭnaletnich i pačali čaściej pryznačać supravadžalnikaŭ dla maładych dziaŭčat.

Adnak sam śviet hiejš praciahvaje žyć amal bieź źmien. Viasnovyja fiestyvali, tancavalnyja vystupleńni i zakrytyja viečaryny pa-raniejšamu źbirajuć klijentaŭ.

Sama Kirytaka kaža, što tak i nie zdoleła całkam adnavicca paśla pieražytaha. Jana stvaryła arhanizacyju «Sietka dla asensavańnia žyćcia majko i kultury zabaŭ», jakaja dapamahaje žančynam u padobnych situacyjach i rychtuje dakłady dla AAN pra stanovišča ŭ kvartałach hiejš Japonii.

• 4
• 0
• 0
• 0
• 0
• 2
• 0
• 0