Za hibiel 18‑hadovaha rabotnika mahiloŭskaha atrakcyjona buduć sudzić dyrektarku

Śledčy kamitet zaviaršyŭ rasśledavańnie trahiedyi, jakaja adbyłasia 1 maja ŭ parku atrakcyjonaŭ u Mahilovie. U hibieli 18‑hadovaha stažora, jaki pracavaŭ na atrakcyjonie «Salta», abvinavacili 25‑hadovuju zahadčycu parku.

Padčas pracy chłopca ŭdaryła karusiel. Jon atrymaŭ ciažkuju traŭmu hałavy i pamior na miescy.

Jak paviedamili ŭ Śledčym kamitecie, zahinuły pracavaŭ biez pracoŭnaj abo hramadzianska-pravavoj damovy. Jon taksama nie prachodziŭ miedycynski ahlad, instruktaž pa pramysłovaj biaśpiecy, navučańnie i stažyroŭku.

Śledstva ličyć, što mienavita hetyja parušeńni stali adnoj z pryčyn niaščasnaha vypadku. Paśla čarhovaha cykłu atrakcyjona stažor vypuskaŭ pasažyraŭ, ale, nasupierak patrabavańniam techniki biaśpieki, nie zafiksavaŭ karusiel. U vyniku bałansir pačaŭ ruchacca i ŭdaryŭ chłopca pa hałavie.

Adkaznaj za trahiedyju śledstva ličyć zahadčycu parku. Pavodle Śledčaha kamiteta, mienavita jana samastojna dapuściła 18‑hadovaha chłopca da pracy, choć nieabchodnych pracedur pierad hetym jon nie prajšoŭ.

Žančynie vystaŭlena abvinavačańnie pavodle častki 2 artykuła 306 Kryminalnaha kodeksa — parušeńnie słužbovaj asobaj, adkaznaj za vykanańnie pravił techniki biaśpieki i achovy pracy, jakoje ź nieaściarožnaści pryviało da śmierci čałavieka. Ciapier abvinavačanaja znachodzicca pad padpiskaj ab niavyjeździe.

Kamientary da artykuła