Biełaruski student stvaryŭ robapavuka z funkcyjaj načnoha bačańnia
Student BDUIR Jahor Klapacki stvaryŭ robata-pavuka, jaki moža vykarystoŭvacca dla pošuku i vyratavańnia ludziej. Robat maje funkcyju načnoha bačańnia i zdolny pracavać u składanych umovach, paviedamlaje BiełTA.
Jahor Klapacki. Fota: BDUIR
Dla maładoha vynachodnika heta ŭžo nie pieršy robat, jakoha jon sprajektavaŭ i ŭvasobiŭ u realnaści. Jašče ŭ školnyja hady Jahor prydumaŭ i pabudavaŭ robata-humanoida Tajrona. Jaho płanavali vykarystoŭvać jak piersanalnaha hałasavoha pamočnika. Robat mieŭ aranžavy koler i byŭ rostam 1,75 mietra.
Fota: BiełTA
Ciapier, pavodle zadumy Klapackaha, Tajron moža vykonvać roznyja funkcyi — naprykład, pracavać nastaŭnikam, achoŭnikam abo supracoŭnikam muzieja. Jon abstalavany videakamieraj, dynamikam i mikrafonam dla znosin ź ludźmi.
Paźniej u vynachodnika źjaviłasia ideja stvaryć robata mienšaha pamieru, ale z bolš šyrokimi mahčymaściami. Tak źjaviŭsia jaho druhi startap-prajekt — robat-pavuk Oniks pamieram prykładna 27 na 40 santymietraŭ.
Oniks moža samastojna pieramiaščacca i aryjentavacca ŭ prastory dziakujučy roznym datčykam. Jon taksama maje dźvie kamiery z funkcyjaj načnoha bačańnia.
Robat moža vykarystoŭvacca dla pošuku ludziej pad zavałami, a taksama na chimičnych pradpryjemstvach. Jon zdolny vyjaŭlać i analizavać uzrovień zabrudžvańnia i papiaredžvać apierataraŭ pra mahčymyja vycieki niebiaśpiečnych rečyvaŭ.
Dla suviazi aŭtanomnamu robatu-pavuku patrebny tolki Wi-Fi. Vynachodnik nie vyklučaje, što ŭ budučyni Oniks mohuć pačać vyrablać sieryjna i pastaŭlać na pradpryjemstvy Biełarusi i inšych krain SND. Pavodle jaho słoŭ, patencyjna zacikaŭlenyja pradpryjemstvy ŭžo jość.
Čytajcie taksama:
Novaja madel GPT-6 Astra prosta ŭziała i prajšła ŭsie 48 uzroŭniaŭ kapčy «Ja nie robat»
Robat pabiŭ suśvietny rekord Usejna Bołta ŭ biehu na 100 mietraŭ