Biełarus paŭhoda sprabavaŭ viarnuć bolš za 6 tysiač jeŭra, jakija zapłaciŭ za časovy ŭvoz mašyny na polskich numarach

Raman (imia źmieniena) užo niekalki hadoŭ žyvie ŭ Polščy. U hetaj krainie jon kupiŭ aŭtamabil i pastaviŭ jaho na ŭlik. A potym pajechaŭ na im u Biełaruś. Jak i naležyć, za časovy ŭvoz mašyny na zamiežnych numarach jon zapłaciŭ zabieśpiačeńnie, jakoje pavinna było viarnucca pry vyvazie mašyny ź Biełarusi. Ale ź viartańniem hrošaj uźnikli prablemy. Na toje, kab ich atrymać, pajšło paŭhoda. Čamu tak zdaryłasia, Raman raskazaŭ vydańniu Most.

Fota: Dziaržaŭny mytny kamitet Biełarusi

Pry ŭvozie mašyny ŭ Biełaruś miažu Raman prachodziŭ nie biez stresu: nadhlad, renthienaŭski kantrol. U jakaści zabieśpiačeńnia časovaha ŭvozu jamu naličyli kala 6 tysiač jeŭra.

Što takoje časovy ŭvoz

Aŭtamabil, zarehistravany za miežami JEAES, možna ŭvieści ŭ Biełaruś dla asabistaha karystańnia, biez myty, na termin da adnaho hoda. Inšaziemcy, a taksama hramadzianie z pašpartami sieryi PP abo adznakaj pra pastanoŭku na konsulski ŭlik za miažoj, pry hetym ničoha nie płaciać. Astatnija biełarusy musiać pakidać finansavuju harantyju ŭ sumie mytnych płaciažoŭ, jakija pryjšłosia b zapłacić pry imparcie takoj mašyny. Hetyja hrošy viartajucca, kali aŭtamabil vyjazdžaje ź JEAES.

Hrošy nie viarnuli, ale vydali papieru

Raman apłaciŭ naličanuju jamu sumu ŭ adździaleńni Biełarusbanka na miažy. Jamu paviedamili, što ŭ momant vyjezdu apłatu viernuć tym ža sposabam. Dla hetaha biełarus dadatkova padaŭ supracoŭnicy mytni razdrukavany numar kart-rachunku.

Padčas viartańnia ŭ Polšču na miažy Ramanu, jak i abiacali, aformili dakumienty na viartańnie hrošaj. Adnak mužčynu naściarožyła adna akaličnaść: supracoŭnica mytni adpraviła jaho ŭ adździaleńnie banka — atrymlivać hrošy hatoŭkaj.

«Ja joj kazaŭ, što hrošy pavinny pryjści na kartu, — kaža biełarus. — Naturalna, u banku mnie nijakich hrošaj nie viarnuli. Supracoŭnica skazała, što jana naohuł upieršyniu ŭ žyćci čuje, kab hrošy viartalisia hatoŭkaj. Chacia, miarkujučy pa ŭzroście, jana ŭžo nie pieršy hod na słužbie».

U toj dzień viarnuć svaje hrošy Ramanu tak i nie ŭdałosia. Zamiest hetaha jamu vydali dakumient, jaki paćviardžaje ŭniasieńnie srodkaŭ. Na słovach jamu patłumačyli, što z hetym dakumientam jon zmoža na praciahu troch hadoŭ jeździć u Biełaruś, nie ŭnosiačy paŭtornaj apłaty za časovy ŭvoz aŭtamabila. Pakolki Raman nieŭzabavie płanavaŭ jašče adnu pajezdku ŭ Biełaruś, jon vyrašyŭ razabracca ź viartańniem hrošaj nastupnym razam.

«Abo apłačvaju paŭtorna, abo jedu nazad u Polšču»

Kali Raman znoŭ pajechaŭ u Biełaruś na toj ža mašynie, byŭ spakojny: nijakich prablem z ujezdam uźniknuć nie pavinna było.

«Ja zadavoleny ŭjazdžaju na biełaruski punkt propusku, idu sa svajoj papieraj da [rabotnicy] mytni, jana praviaraje infarmacyju i kaža, što maich hrošaj u ich niama. Pryčym jana bačyć, što ja ich nie zabiraŭ, ale nie viedaje, dzie jany. I abo ja apłačvaju zabieśpiačeńnie paŭtorna, abo źjazdžaju nazad u Polšču», — raskazvaje mužčyna.

Raman pačaŭ telefanavać pa numarach mytnaha viedamstva, paznačanych na aficyjnym sajcie. U vyniku jamu ŭdałosia źviazacca z načalnicaj źmieny, jakaja pracavała ŭ toj dzień, kali mužčyna ŭpieršyniu ŭjazdžaŭ u Biełaruś. Paśla pravierki dakumientaŭ toj paviedamiŭ Ramanu, što jon niapravilna aformiŭ dakumienty: adsutničaŭ kart-rachunak dla viartańnia srodkaŭ.

«Ja dakładna jaho paznačaŭ», — śćviardžaje mužčyna.

Tym nie mienš, Ramanu daviałosia viarnucca ŭ Polšču, pakinuć aŭtamabil na parkoŭcy kala miažy, jakaja kaštavała 60 złotych na tydzień, i ŭjechać u Biełaruś užo na aŭtobusie. Ahułam praz heta mužčyna straciŭ kala 10 hadzin.

«Jak tak? Vašy hrošy lažać u nas na rachunku»

Viarnuŭšysia dadomu, mužčyna adrazu pačaŭ vyrašać prablemu.

«Pačaŭ znoŭ telefanavać na mytniu. Pašancavała trapić na vielmi kvalifikavanuju supracoŭnicu, jakaja raskazała, što treba budzie zrabić, kali budu vyjazdžać ź Biełarusi. A na majo pytańnie, čamu mytnia nie bačyć maich hrošaj u sistemie, jana skazała: «Jak tak? Vašy hrošy lažać u nas na rachunku», — uznaŭlaje jaje słovy Raman.

U vyniku Raman pryjšoŭ da vysnovy, što adna supracoŭnica zhubiła jaho kart-rachunak, a druhaja nie viedała, što ŭ padobnych situacyjach hrošy viartajucca na bankaŭskuju kartu.

Ź Biełarusi ŭ Polšču Raman taksama viartaŭsia na aŭtobusie. Tady jamu pryjšłosia aformić vyjezd aŭtamabila, jaki tak i nie puścili ŭ krainu.

«Praz 1,5 miesiaca hrošy pastupili mnie na rachunak u toj ža sumie, u jakoj byli spłačanyja, — kaža biełarus. — Na viartańnie pajšło kala paŭhoda».

«Na biełaruskim punkcie propusku ty zaŭsiody ŭ napružańni, a na polskim — jak doma»

Paśla hetaha vypadku Raman aformiŭ konsulski ŭlik i jeździć u Biełaruś biez prablem. Adnak niadaŭna ŭ padobnuju situacyju trapili znajomyja mužčyny.

«Sistema pracuje, ale tolki tady, kali supracoŭniki kampietentnyja ŭ svaich abaviazkach, — ličyć jon. — Ale kryŭdna, što na biełaruskim punkcie propusku ty zaŭsiody ŭ napružańni, a na polskim baku adčuvaješ siabie jak doma. A pavinna ž być naadvarot. Na polskim baku ŭ mianie nikoli nie było prablem, choć u mianie zvyčajny časovy DNŽ, nu i pa-polsku razmaŭlaju prystojna».

Kamientary da artykuła