Tramp padpiša zakon ab «piakielnych» sankcyjach suprać Rasii
Jon daje prava ŭvodzić pošliny suprać najbujniejšych pakupnikoŭ rasijskaj nafty i hazu.
Fota: Alex Brandon-Pool / Getty Images
Pradstaŭnik Biełaha doma paćvierdziŭ, što prezident ZŠA Donald Tramp płanuje padpisać zakonaprajekt ab sankcyjach suprać Rasii. Dakumient, uchvaleny Pałataj pradstaŭnikoŭ 262 hałasami suprać 159, daje Trampu prava ŭvodzić pošliny da 100% suprać krain, jakija kuplajuć rasijskuju naftu i haz, piša RBK-Ukraina.
Jon taksama praciahvaje sankcyi suprać Irana da 2031 hoda.
Pavodle słoŭ sienatarki Džyn Šachin, najvyšejšaj pa ranhu demakratki ŭ Kamitecie Sienata pa zamiežnych spravach, siarod piaci najbujniejšych imparcioraŭ rasijskaha vykapniovaha paliva mienavita Kitaj zabiaśpiečvaje 51% dachodaŭ Maskvy ad takoha ekspartu.
Kanhresmien Majkł Makkoł, jaki byŭ inicyjataram zakonaprajekta, padkreśliŭ: uchvaleńnie dakumienta napiaredadni zimovych miesiacaŭ važnaje, pakolki heta akazvaje cisk na Pucina i jaho sajuźnikaŭ da taho, jak Rasija moža pačać nanosić udary pa hramadzianskaj infrastruktury — abjektach, źviazanych z dostupam da śviatła i vady.
«Heta ŭdaryć pa ich tam, dzie sapraŭdy baluča, i daść nieabchodny ryčah upłyvu, kab pasadzić Pucina za stoł pieramovaŭ. Heta taksama ciśnie na Kitaj, kab prymusić Pucina sieści za stoł, bo jany taksama pacierpiać ad hetych mytaŭ», — zajaviŭ Makkoł.
U toj ža čas demakrat najvyšejšaha ranhu ŭ Kamitecie Pałaty pradstaŭnikoŭ pa zamiežnych spravach Hrehary Miks vykazaŭ sumnieŭ, što zakon dasiahnie svajoj mety.
«Jon daje prezidentu Trampu šyrokija novyja paŭnamoctvy ŭ śfiery taryfaŭ i dazvalaje jamu admianiać tyja ž sankcyi, jakija jon nibyta ŭvodzić, — sankcyi, jakija jon moh by ŭvieści ŭžo siońnia, ale nie rabiŭ hetaha apošnija 19 miesiacaŭ», — zajaviŭ Miks.