Biełarus, jakoha abmianiali na Pačobuta, nie pryjechaŭ na svoj sud u Polščy

Sud byŭ adkładzieny, pakolki abvinavačany ŭ trochhadovym špijanažy suprać Polščy nie pryjechaŭ na pasiadžeńnie ź Biełarusi.

Uładzisłaŭ Nadziejka. Fota ź jaho vydalenaj staronki ŭ Adnakłaśnikach

Sudovaje pasiadžeńnie rajonnaha suda Biełastoka pavinna było pačacca 16 vieraśnia, ale jaho adkłali praz toje, što padsudny nie źjaviŭsia, piša «Biełsat».

Pry hetym raniej abvinavačany ŭ špijanažy biełarus užo daŭ pakazańni i pahadziŭsia na praciah sudovaha razhladu ŭ jaho adsutnaść, a taksama padaŭ kantaktny adras elektronnaj pošty dla pozvy. Ale sud vyrašyŭ, što hetaha niedastatkova dla razhladu ŭ jaho adsutnaść, i jašče raz nakiruje pozvu ŭ ambasadu Biełarusi ŭ Polščy z prośbaj asabista ŭručyć jaje abvinavačanamu.

Prakuror Lešak Božek paviedamiŭ, što abvinavačany zaraz nie ŭ Polščy ŭ suviazi z abmienam źniavolenymi ź Biełaruśsiu. Jon admoviŭsia kamientavać abvinavačańni, adnak skazaŭ, što «dziejańni abvinavačanaha byli nakiravanyja pieradusim suprać biełaruskaj demakratyčnaj apazicyi ŭ Polščy».

Prakuror padaść chadajnictva ab zasakrečvańni pakazańniaŭ abvinavačanaha, u tym liku z-za aściaroh za dabrabyt śviedak, danyja pra jakich źbiraŭ abvinavačany.

«Hetaja sprava viadomaja, abvinavačanaha zamianiŭ spadar (Andžej) Pačobut. Heta było pytańnie dziaržaŭnaj važnaści, i jano było pryznanaje bolš značnym», — zajaviŭ advakat abvinavačanaha Michał Korsak.

Advakat taksama zajaviŭ, što apošni raz bačyŭ padsudnaha ŭ krasaviku, kali toj znachodziŭsia pad vartaj u Biełastoku.

Jon dadaŭ, što mužčyna raniej davaŭ pakazańni pa spravie i pahadžaŭsia źjavicca ŭ luby čas, ale zaraz advakat acaniŭ jaŭku padsudnaha jak sumnieŭnuju praz «ciažkaści vystaŭlenych abvinavačańniaŭ, jaho papiarednija pavodziny i toje, što jon ździejśniŭ».

U vyniku abmienu źniavolenymi 28 krasavika ź Biełarusi vyzvalili Andžeja Pačobuta, dvuch palakaŭ i dvuch małdavanaŭ, z polskaha boku — piać hramadzianaŭ Biełarusi, Rasiei i inšych dziaržaŭ SND.

Siarod pieradadzienych biełaruskamu boku asob ad pačatku było niekalki čałaviek, imiony jakich trymalisia ŭ tajamnicy i jakija vykonvali «asabliva važnyja zadańni ŭ intaresach nacyjanalnaj biaśpieki».

Adnym ź ich byŭ 33‑hadovy hramadzianin Biełarusi Uładzisłaŭ Nadziejka, jakoha zatrymali ŭ 2025 hodzie pavodle abvinavačańnia ŭ špijanažy na karyść zamiežnaj raźviedki.

Tady paviedamlałasia, što mužčyna byŭ udzielnikam biełastockaj charuhvy «Paspalitaha rušeńnia», a jahonaje imia raniej zhadvałasia KDB Biełarusi ŭ suviazi z «ekstremisckim farmavańniem» «Biełaruskaja hrenadziorskaja charuhva».

U Polščy Nadziejka zajmaŭsia pieravozkami pasažyraŭ jak indyvidualny pradprymalnik, što supadała ź infarmacyjaj ŚMI pra zatrymańnie taksista-aktyvista, jaki moh być datyčny da špijonskaj sietki KDB u Jeŭropie.

Kamientary da artykuła